Корхонанинг банкдаги ҳисоб-рақамидан ойлик иш ҳақи учун нақд пул маблағлари олинганида, корхона томонидан кассир ёки кассир вазифасини бажарувчи моддий жавобгар шахс номига чек расмийлаштирилади. Банк нақд пул маблағларини ушбу чекка асосан чекда номи кўрсатилган корхона ходимига топширади. Корхона кассасига бу пул маблағлари айнан чекда кўрсатилган ходим томонидан топширилади.

Корхона кассасига нақд пул маблағлари бош бухгалтернинг имзоси қўйилган касса кирим ордери бўйича қабул қилинади. Корхонанинг банкдаги хисоб-рақамидан ойлик иш ҳақи учун олинган нақд пул маблағлари корхона кассасига қабул қилинганда, бош бухгалтер ҳамда кассир томонидан имзоланган, кассир муҳри билан тасдиқланган касса кирим ордерининг квитанция қисми пул топширган шахсга берилади (АВда 22.06.2015й. 2687-сон билан рўйхатга олинган қарорга илова).

Бунда банкдан битта чек билан олинган нақд пул маблағлари учун битта касса кирим ордери расмийлаштирилади.