Қайта сотиш мақсадида олинган товарларни сотишга доир фаолият савдо фаолияти ҳисобланади (СКнинг 22-моддаси).
Улгуржи савдо деганда эса тижорат мақсадларида ёки ўз ишлаб чиқариш-хўжалик эҳтиёжлари учун фойдаланиш учун ҳисоб-китобларнинг нақдинасиз шаклида харид қилинадиган товарларни сотиш тушунилади (Улгуржи ва чакана савдо фаолиятини амалга ошириш тартиби тўғрисида Низом, ВМнинг 26.11.2002й. 407-сонли қарори иловаси).
Иқтисодий фаолият турларининг умумдавлат таснифлагичига (ИФУТ) берилган изоҳларга асосан савдо фаолияти (қайта ишлашсиз) ўз ичига саралаш, калибрлаш, йиғиш, аралаштириш, қадоқлаш, бўлиш ва кичикроқ партияларда идишларга жойлаш каби оддий савдо операцияларини ўз ичига олади.
Сизнинг ҳолатда Янги йил совғаларини таёрлаш учун бошқа корхоналардан хўл мева, ҳар-ҳил ўйинчоқлар, ширинликлар, конфетлар – товар сифатида сотиб олинмоқда. Кейинчалик ушбу товарлар Янги йил совғаси сифатида битта қутига жойлаштирилиб мижозга пул ўтказиш йўли билан сотилмоқда ва унга счет-фактура ёзиб берилмоқда.
Қонунчиликда савдо фаолияти учун берилган таърифларга кўра сизнинг амалга ошираётган ушбу операция – улгуржи савдо операцияси деб тан олиниши мумкин. Улгуржи савдони амалга ошириш учун эса махсус лицензия талаб этилади. Шунингдек ЯСТ тўловчилари савдо тушуми бўйича алоҳида ҳисоб-китобни юритиб, тушум суммасидан белгиланган 5% ставкада ЯСТ тўлашлари лозим.
Агар сизнинг корхонада улгуржи савдо фаолиятини амалга оширишни рухсат берувчи лицензия мавжуд бўлмаса, келгусида бундан операция бўйича зиддиятларга дуч келмаслик учун Янги йил совғалари учун хўл мева, ҳар-ҳил ўйинчоқлар, ширинликлар, конфетларни мижознинг ўзи сотиб олиб, уларни сизнинг корхонага Янги йил совғаларини таёрлашга берилишини тавсия этамиз. Корхонангиз эса мижоздан олинган ушбу товарлар асосида Янги йил совғасини таёрлаб бериш хизматини кўрсатади.
Жавоблар улар эълон қилинган санада долзарб ҳисобланади.