1.Ўртача ойлик иш ҳақини ҳисоблаб чиқариш ВМнинг 11.03.1997 йилдаги 133-сон қарори билан тасдиқланган тартибда (кейинги ўринларда –Тартиб) амалга оширилади.

Агар ходим бир йилда икки марта таътилга чиқадиган бўлса, иккинчи таътил учун тўланадиган ҳақ суммасини ҳисоблаб чиқаришда тарифакация бўйича белгиланган иш ҳақидан (ёки лавозим маошидан) ошган тўловларга, жумладан, аввалги таътил пули суммасидаги тарифдан ошган қисми ҳам киритилади.

Иккинчи таътил ҳақи суммасини ҳисоблаб чиқаришда иштирок этадиган аввалги таътил пулининг тарифдан ташқари қисмига келсак, уни ҳисоблаб топиш усуллари қонун ҳужжатларида белгиланмаган ва унга бағишланган бирор-бир қонун ҳужжати мавжуд эмас. СБХ газетасининг саволда кўрсатилган сонларида турли экспертларнинг шахсий фикрлари келтирилган. Лекин  фикримизча ҳисоб-китобнинг саволда келтирилган иккинчи варианти тўғри, чунки унда таътил пулидан тарифдан юқори қисмининг ҳақиқатдаги суммаси ажратиб олинади. Ушбу хулосамизни қуйида асослаб беришга ҳаракат қиламиз.

(Саволда келтирилган мисолда ҳисоб-китоб даври 7 ой деб берилган, лекин ҳисоб-китоб 24 кун учун қилинган. Тушунишимизча таътил корхонада 7 ой ишлаган ходимга берилган, ортиқча қисми аванс тариқасида берилган бўлса керак. Таътил ходим корхонада ҳақиқатда ишлаган даврига мутаносиб вақтга берилади. Бундай ҳолда таътил куни 14 кунни ташкил этади (24 / 12 * 7 = 14). Шунинг учун қуйида келтирилган мисолда таътил пулини 14 кунга ҳисоблаб чиқарамиз).

Ходим биринчи марта таътилга чиққанида таътил пули қуйидагича ҳисоблаб чиқарилган:

(2 800 191,8 + 13 092 568,78 / 12) / 25,4 * 14 = 2 144 777,51 сўм – таътил пули

Юқоридаги амални математика қоидаларига биноан очиб ташлаб ёзамиз (яъни қавсларни очиб ташлаймиз):

2 800 191,8 / 25,4 * 14 + 13 092 568,78 / 12 / 25,4 * 14 = 2 144 777,51 сўм – таътил пули.

Бунда:

2 800 191,8 / 25,4 * 14 = 1 543 412,8  –  таътил пулининг тариф қисми;

13 092 568,78 / 12 / 25,4 * 14 = 601 364,71  – таътил пулининг тарифдан юқори қисми.

Кейинги таътил пулини ҳисоблашда (ёки бошқа мақсадда) ўртача ойлик иш ҳақини аниқлаш учун  601 364,71 сўм ҳисоб-китобга киритилади.

2.Огоҳлантириш муддати ўрнига компенсация пули тўланганда ўртача ойлик иш ҳақи Тартибнинг 5-бандига асосан, охирги икки календарь ойидаги ўртача ойлик иш ҳақидан келиб чиқиб аниқланади. Бунда охирги икки ойлик жами иш ҳақининг суммаси иккига бўлинади. Агар охирги икки ой ичида таътил пули ҳам тўланган бўлса, жами иш ҳақи таркибига таътил пули тўлиқ миқдорда киритилади. Қўшимча маълумотни қуйидаги манбадан олишингиз мумкин:

https://kadrovik.uz/question/8989?us=7dluo5b4a1kifovlou3a8cofd2

Шунингдек, қўшимча маълумотларни СБХ 2017 йилдаги 35-сонининг “Амалий бухгалтерия” бўлимида чиққан материалдан олишингиз мумкин.