Йўқ, нотўғри.
Ишсизлар - 16 ёшдан то пенсия билан таъминланиш ҳуқуқини олишгача бўлган ёшдаги, ҳақ тўланадиган ишга ёки даромад келтирадиган машғулотга эга бўлмаган, иш қидираётган ва иш таклиф этилса, унга киришишга тайёр бўлган ёхуд касбга тайёрлашдан, қайта тайёрлашдан ўтишга ёки малакасини оширишга тайёр бўлган меҳнатга лаёқатли шахслар (бундан таълим муассасаларида таълим олаётганлар мустасно). Юқорида кўрсатилган, ишга жойлашишда кўмак олиш учун маҳаллий меҳнат органларига мурожаат қилган ва улар томонидан иш қидирувчи сифатида рўйхатга олинган шахслар ишсиз деб эътироф этилади. Шахсларни ишсиз деб эътироф этиш тўғрисидаги қарор маҳаллий меҳнат органи томонидан улар иш қидираётган шахс сифатида рўйхатга олинган кундан эътиборан ўн биринчи кундан кечиктирмай қабул қилинади.
Қуйидагилар ишсиз деб эътироф этилмайди:
- меҳнат органларида рўйхатга олинган кундан бошлаб 10 кун ичида таклиф этилган мақбул келадиган ишни 2 марта рад этган шахслар;
- рўйхатга олинган кундан бошлаб 10 кун ичида мақбул келадиган ишни қидириш мақсадида узрсиз сабабларга кўра меҳнат органига келмаган шахслар.
Таклиф этилган ишдан бош тортган кундан ёки мақбул келадиган ишни қидириш мақсадида узрсиз сабабларга кўра меҳнат органига келмаган кундан бошлаб ўттиз календарь кун ўтганидан кейингина шахс иш қидираётган сифатида қайта рўйхатдан ўтишга ҳақли бўлади (“Аҳолини иш билан таъминлаш тўғрисида”ги Қонуннинг 3-м.).
Демак, шахсни ишсиз деб эътироф қилиш учун юқорида кўрсатилган шартлар бажарилиши керак. Маҳаллий меҳнат органи томонидан келтирилган сабаблар эса ушбу шартлар сирасига кирмайди.
Жавоблар улар эълон қилинган санада долзарб ҳисобланади.