Қонунчиликда лавозим йўриқномаларига ўзгартиришлар киритишда ходимнинг розилиги олиниши белгиланмаган. Лекин Меҳнат кодексининг (МК) 89-моддасига асосан иш берувчи ходимнинг розилигисиз меҳнат шартларини ўзгартиришга технологиядаги, ишлаб чиқариш ва меҳнатни ташкил этишдаги ўзгаришлар, ишлар (маҳсулот, хизматлар) ҳажмининг қисқарганлиги сабабли ҳақли бўлади. Бунда иш берувчи меҳнат шартларидаги бўлажак ўзгаришлар ҳақида ходимни камида 2 ой олдин ёзма равишда огоҳлантириб тилхат олиши шарт. Кўрсатилган муддатни қисқартиришга фақат ходимнинг розилиги билан йўл қўйилади. Шунинг учун лавозим йўриқномасига киритилаётган ўзгартиришлар меҳнат шартларини ўзгартириш билан боғлиқ бўлса, у ҳолда ходимни 2 ой олдин огохлантириш шарт. Меҳнат шартлари тушунчаси МКнинг 88-моддасида кўрсатиб ўтилган.

Агарда лавозим йўриқномасига киритилаётган ўзгартиришлар ходимнинг меҳнат вазифалари ўзгариши - бошқа мутахассислик, малака, лавозим бўйича ишлаш билан боғлиқ бўлса, МКнинг 92-моддасига асосан унинг розилигини олиш керак бўлади.

Юқоридаги ҳолларда лавозим йўриқномасига киритилаётган ўзгартиришлар меҳнат шартномасида кўрсатилган шартларга таъсир қилса ёки уларга зид бўлса, меҳнат шартномасига қўшимча келишув тузиш орқали ўзгартиришлар киритиш лозим.