Саволга божхона тўловлари Бошқармасидан жавоб олинган:

«2015 йил 20 июлдаги 197-сонли Вазирлар Махкамаси қарори (ВМҚ) билан Экспорт-импорт операцияларини амалга оширишда давлат божхона хизмати органларига тақдим этиладиган ҳужжатлар рўйхати тасдиқланган.

“Эркин муомалага чиқариш (импорт)” божхона режимида олиб кириладиган товарларни божхонада расмийлаштиришда божхона органларига қуйидагилар тақдим этилади:

- Божхона юк декларацияси, йўловчи божхона декларациясини тўлдириш йўли билан товарларни декларациялаш ҳоллари бундан мустасно.

- Транспорт ҳужжатлари, ўров варағи бундан мустасно.

- Товарларнинг келиб чиқиши сертификати (манфаатдор шахснинг хоҳиши бўйича ва унинг зарурлиги халқаро шартномаларида назарда тутилган ҳолларда).

Товарларни божхонада электрон шаклда “Товарларни божхонада электрон шаклда декларациялаш тартиби тўғрисида Низомга асосан расмийлаштирилади (2018 йил 31 июлдаги 605-сонли ВМҚ). Ташқи иқтисодий фаолият иштирокчининг хохишига кўра божхонада расмийлаштириш учун барча керакли хужжатлар,  шу жумладан ваколатли органлар хужжатлари  қоғоз манбаларда тақдим этилиши мумкин.

Товарларнинг, шу жумладан электрон шаклдаги божхона расмийлаштируви хизмат кўрсатувчи банклар (ғазначиликлар) томонидан тақдим этиладиган Давлат божхона қўмитасининг Ягона автоматлаштирилган ахборот тизимида (ЯААТ) тўловчининг шахсий ҳисоб рақами бўйича божхона тўловлари тўланганлиги тўғрисидаги маълумотлар мавжуд бўлган тақдирда амалга оширилади (божхона тўловларини тўлаш кечиктирилиши ёки бўлиб-бўлиб тўлашга рухсат берилиши ҳоллари бундан мустасно).

Божхона кодексининг (БК) 249 моддасига асосан Тегишли божхона режимига жойлаштириш учун рухсат этиш хусусиятига эга ҳужжатлар олинишини талаб этувчи товарларнинг божхона расмийлаштируви амалга оширилаётганда божхона органи ЕАИСда бундай ҳужжатнинг мавжудлигини текширади.

ЕАИСда тегишли рухсат этиш хусусиятига эга ҳужжат мавжуд бўлмаган тақдирда божхона органлари божхона расмийлаштирувини рад этиш ҳуқуқига эга.

БКнинг 289 моддасига асосан Товарларни божхона чегараси орқали олиб ўтишда ва ушбу Кодексда назарда тутилган бошқа ҳолларда қуйидаги божхона тўловлари тўланади:

- божхона божи (импорт божхона божлари ставкалари 2018 йил 29 июндаги ПҚ-3818-сон билан тасдиқланган);

- акциз солиғи (ставкалари 2018 йил 29 июндаги ПҚ-3818-сон билан тасдиқланган) ;

- қўшилган қиймат солиғи (Солиқ кодексга асосан 15% этиб белгиланган);

- расмийлаштириш учун божхона йиғимлари (расмийлаштириш учун божхона йиғимлари товарлар божхона қийматининг 0,2 %, бироқ 25 АҚШ доллардан кам бўлмаган ва 3000 АҚШ долларидан ортиқ бўлмаган  миқдорда ўрнатилган, 1999 йил 30 апрелдаги 204-сонли ВМҚ)

Қонун ҳужжатларида бошқа божхона тўловлари ҳам белгиланиши мумкин.

БКнинг 292 моддасига асосан божхона чегараси орқали олиб ўтиладиган товарларга нисбатан қўлланиладиган божхона божлари ставкалари Ташқи иқтисодий фаолиятининг товар номенклатурасига (ТИФТН) мувофиқ тизимлаштирилган.

Божхонада расмийлаштиришда божхона органига БК ва Товарларнинг божхона қийматини белгилаш бўйича йўриқномага асосан  декларант ёки божхона брокери томонидан маълум қилган товарнинг божхона қиймати божхона тўловларини ҳисоблаш учун асос бўлади ( Йўриқнома АВ 13.11.1998й.  №390).

БКнинг 297 модда 2 қисм 9 бандига асосан устав фондида (устав капиталида) чет эл инвестицияларининг улуши камида 33% бўлган чет эл инвестициялари иштирокидаги корхоналар томонидан улар давлат рўйхатидан ўтказилган пайтдан эътиборан икки йил давомида ўз ишлаб чиқариш эҳтиёжлари учун божхона ҳудудига олиб кириладиган мол-мулк божхона божидан озод этилади.

Маълумот учун: 2011 й. 16 майдаги 136 сонли ВМКга асосан ўз ишлаб чиқариш эҳтиёжлари учун мол-мулкни олиб киришда эркин муомалага чиқариш режимига божхона расмийлаштируви пайтида ўз ишлаб чиқариш эҳтиёжлари учун олиб кирилган мол-мулк учун сертификат мавжуд бўлсагина қонун ҳужжатларида назарда тутилган божхона тўловлари бўйича имтиёзлар берилади.

БКнинг 297 модда 2 қисм 13 бандига ва СКнинг 246 модда 2 бандига асосан божхона ҳудудига тасдиқланадиган рўйхат бўйича (ВМда 20.03.2013йилда 2436-сон билан рўйхатга олинган Низом) олиб кирилаётган технологик асбоб-ускуналар, шунингдек бутловчи буюмлар ва эҳтиёт қисмлар, агар уларни етказиб бериш контракти (шартномаси, келишуви) шартларида назарда тутилган бўлса ипорт божхона божи ва ҚҚСдан озод этилади. Олиб кирилган технологик асбоб-ускуналар олиб кирилган пайтдан эътиборан уч йил мобайнида экспортга реализация қилинган ёки текин берилган тақдирда, мазкур имтиёзнинг амал қилиши божхона божларини тўлаш мажбуриятлари тикланган ҳолда бекор қилинади;

Қўшимча маълум қиламизки ДБҚ сайтида “Интеграциялаштирилган тариф” интеракив хизмати жорий этилган ва унда реал вақт режимида текин бўлган қуйидаги барча маълумотларни олиш мумкин:

- божхона чегарасидан товарларни олиб ўтиладиган режимларни тартибга солувчи норматив хужжатлар;

- товарларни божхонада расмийлаштириш учун хужжатлар;

- хар бир товарга қўлланиладиган божхона тўловлар ставкалари;

- кўрсатилган хужжатларни берадиган органлар тўғрисида;

- ташқи иқтисодий фаолиятни амалга ошириш учун бошқа маълумотлар.»