Кафолат муддати ичида алмаштирилган ускуна импорти ҳисоби
1.Кафолат муддати давомида бузилган ускуналар ўрнига импорт қилиб олиб келинган ускуналар дилер корхонанинг бухгалтерия ҳисобида балансдан ташқари 004 «Комиссияга қабул қилинган товарлар» счётининг дебетига кирим қилинади ҳамда ўрнатилгач, ушбу счётнинг кредитига чиқим қилинади.
Божхона тўловлари, ҚҚС ва ускуна импорти билан боғлиқ бошқа харажатлар чет эл корхонаси томонидан қоплаб берилмаса, корхона харажатларига олиб борилади ва қуйидагича бухгалтерия ўтказмалари берилади:
Хўжалик операциясининг мазмуни | Дебет | Кредит |
Божхона тўловлари, декларант хизмати ва бошқалар ҳисобланиши | 9430 «Бошқа операцион харажатлар» | 6990 «Бошқа мажбуриятлар», 6010 «Мол етказиб берувчилар ва пудратчиларга тўланадиган счётлар» |
Ускунани импорт қилишдаги ҚҚС, декларант хизматидаги ҚҚС ва импорт билан боғлиқ бошқа харажатлардаги ҚҚС акс эттирилди | 4410 «Бюджетга солиқлар ва бошқа мажбурий тўловлар бўйича бўнак тўловлари (турлари бўйича)» | 6990 «Бошқа мажбуриятлар», 6010 «Мол етказиб берувчилар ва пудратчиларга тўланадиган счётлар» |
2.Агар харидор томонидан сотиб олинадиган ускуна корхонангиз номига импорт қилинса, у ҳолда корхонангиз дилер сифатида иштирок этганлиги сабабли, харидор сизнинг корхонангизга пул тўлаб беради, корхонангиз бу пулни конвертация қилиб чет эллик корхонага тўлаб беради. Бунда корхонангиз учун солиқ оқибатлари йўқ.
Корхонангиз чет эллик корхонадан хизмати эвазига ҳақ олганида даромад кўради. Ушбу хизматни кўрсатиш жойи Ўзбекистон деб тан олинади ва шу сабабли ҚҚС солинади (СК 241-моддаси 3-қисми 2-банди, СК 238-моддаси 1-қисми 1-банди). ҚҚС бўйича солиқ базаси солиқ суммасини ўз ичига олувчи воситачилик ҳақи ҳисобланади (СК 250-моддаси 1-қисми 1-банди). Солиқ ставкаси - 15% (СК 258-моддаси 1-қисми).
ҚҚСни ҳисобга олмагандаги воситачилик ҳақи суммаси корхона даромади ҳисобланади ва фойда солиғини ҳисоблашда солиқ базасига киритилади (СК 297-моддаси 3-қисми 1-банди).
Жавоблар улар эълон қилинган санада долзарб ҳисобланади.