Фуқаролик-ҳуқуқий тусдаги шартнома асосида ёлланган жисмоний шахсга хизмат сафари харажатлари тўланмаслиги
- Предмети ишларни бажариш ва хизматлар кўрсатишдан иборат бўлган, тузилган фуқаролик-ҳуқуқий тусдаги шартномаларга мувофиқ жисмоний шахсларга тўловлар (бундан якка тартибдаги тадбиркорлик фаолиятидан олинган даромадлар мустасно) меҳнатга ҳақ тўлаш тарзидаги даромадлар жумласига киради (СК 371-моддаси 2-қисми). Меҳнатга ҳақ тўлаш тарзидаги даромадлар ижтимоий солиқ, ЖШДС ва ФЖБПТга мажбурий ажратмаларга тортилади (СК 403-404 моддалари, 387-моддаси 1-қисми 1-банди, 02.12.2004 йилдаги №702-II сон «Фуқароларнинг жамғариб бориладиган пенсия таъминоти тўғрисида»ги Қонуни 10-моддаси).
Ҳар қандай чиқимлар, башарти улар ҳеч бўлмаганда қуйидаги шартлардан бирига мувофиқ келган тақдирда, иқтисодий жиҳатдан ўзини оқлаган чиқимлар деб эътироф этилади ва фойда солиғини ҳисоблашда чегирилади (СК 305-моддаси 4-қисми):
1) даромад олишга қаратилган фаолиятни амалга ошириш мақсадида қилинган бўлса;
2) шундай тадбиркорлик фаолиятини сақлаб туриш ёки ривожлантириш учун зарур бўлса ёхуд хизмат қилса ва харажатларнинг тадбиркорлик фаолияти билан алоқаси аниқ асосланган бўлса;
3) қонун ҳужжатларининг қоидаларидан келиб чиқса.
Агар корхона фуқаролик-ҳуқуқий тусдаги шартнома асосида ёлланган жисмоний шахсга тўлайдиган ҳақ ушбу талаблардан ҳеч бўлмаса биттасига мувофиқ келса, ушбу иш ҳақи ва унга ҳисобланган ижтимоий солиқ суммаси фойда солиғини ҳисоблашда солиқ базасидан чегирилади.
2. Корхона хизмат сафарига меҳнат шартномасига асосан ишлайдиган ишчи-ходимларини жўнатиши мумкин. Бошқа жисмоний шахслар корхона томонидан хизмат сафарига жўнатилиши ва уларга хизмат сафари харажатлари тўлаб берилиши қонунчилик томонидан кўзда тутилмаган. Агар фуқаролик-ҳуқуқий тусдаги шартномада ушбу жисмоний шахсга Эронга бориши учун авиабилет, меҳмонхона харажатлари, суткалик харажатлар учун пул тўлаб берилиши кўзда тутилган бўлса, у ҳолда ушбу суммалар ҳам шу шартнома бўйича унга тўланадиган иш ҳақига тенглаштирилади ва солиқ оқибатлари худди 1-саволга жавобдаги каби бўлади.
Корхонангиз бу суммаларни жисмоний шахсга нақд пул кўринишида ёки унинг пластик картасига пул кўчириш йўли билан тўлаб бериши мумкин.
Жавоблар улар эълон қилинган санада долзарб ҳисобланади.