Чет эллик корхонага қайта суғурта шартномалари бўйича мукофот тўлашнинг солиқ оқибатлари
Корхонангиз суғурта шартномалари бўйича жавобгарликларни чет эл суғурта брокерига қайта суғуртага берганида унга суғурта мукофотини тўлаб беради.
Корхонангиз Ўзбекистон Республикасида рўйхатдан ўтганлиги сабабли чет эллик қайта суғурта брокери хизматларини амалга ошириш жойи Ўзбекистон Республикаси ҳудуди ҳисобланади (СК 241-моддаси 1, 2-қисмлари). Демак, бу айланма ҚҚС объекти ҳисобланади (СК 238-моддаси 1-қисми 1-банди). Қайта суғурталаш шартномалари бўйича олинган суғурта мукофотлари ҚҚСдан озод (СК 245-моддаси 1-қисми 1-банди).
Норезидентнинг Ўзбекистон Республикасидаги манбалардан олинган ва доимий муассаса билан боғлиқ бўлмаган даромадларидан олинадиган солиқ норезидентга даромад тўловчи солиқ агенти томонидан ҳисоблаб чиқарилади ва ушлаб қолинади (СК 351-моддаси 1-қисми). Ўзбекистон Республикасида юзага келадиган таваккалчиликларни суғурталаш, биргаликда суғурталаш ва қайта суғурталаш шартномалари бўйича тўланадиган суғурта мукофотлари шундай даромадлар жумласига киради (СК 351-моддаси 2-қисми 7-банди). Чет эллик қайта суғурта брокерига қайта суғурта қилиш шартномалари бўйича суғурта мукофотларини тўлаб беришда норезидентнинг даромадларидан олинадиган солиқ ставкаси 10%га тенг (СК 353-моддаси 2-банди).
Ўзбекистон Республикаси Ҳукумати билан Буюк Британия ва Шимолий Ирландия Бирлашган Қироллиги Ҳукумати ўртасида Конвенция мавжуд (1993 йил 15 октябрда имзоланган, 1994 йил 10 июндан кучга кирган). Унга кўра Лондонда рўйхатдан ўтган қайта суғурта брокери Ўзбекистон ҳудудида қайта суғурталаш шартномалари бўйича тўланадиган суғурта мукофотлари олса, ушбу даромад Буюк Британияда солиққа тортилади (Конвенциянинг 7-моддаси). Бунинг учун қайта суғурта брокери корхонангизга ушбу даромад олинаётган йилда Буюк Британиянинг солиқ резиденти эканлигини тасдиқловчи ҳужжат тақдим этиши керак.
Жавоблар улар эълон қилинган санада долзарб ҳисобланади.