Товарларни импорт қилиш чоғида божхонада ҳисобланган  ҚҚС суммасини ҳисобга олиш учун ҚҚС ҳақиқатда тўланган бўлиши лозим (СК 266-м. 1-қ.3-б.).

Товарларни импорт қилишда солиқ тўловчиларга ҚҚС тўлов муддатини узайтириш имконияти давлат божхона хизмати органининг қарори билан берилади. Берилган тўлов муддатини узайтириш даврида ҚҚС суммасининг (ёки унинг бир қисмининг) тўланиши солиқ тўловчига Ўзбекистон Республикаси Давлат бюджетига тўланадиган ҚҚСни ҳисоблашда ушбу суммани Ўзбекистон Республикаси Солиқ кодексига мувофиқ ҳисобга олиш ҳуқуқини беради (ВМнинг 10.02.2020 йилдаги 76-сон қарорига иловадаги Низомнинг 8, 15-бандлари).

Яъни тўлов муддатини узайтириш даврида тўланган ҚҚС суммалари айнан тўлов амалга оширилган пайтда ҳисобга олинади. Корхона тўланган ҚҚСни ҳисобга олиш учун 2020 йил декабрь ойи учун эмас, божхона тўловлари бўлиб-бўлиб тўланган давр учун аниқлаштирилган ҚҚС ҳисоботини тақдим этиши керак.

Аниқлаштирилган ҚҚС ҳисоботини тақдим этиш – бу солиқ тўловчининг ҳуқуқи (СК 83-м.2-қ.). Агар уни тақдим этишнинг техник жиҳатдан имконияти бўлмаса, ушбу муаммони бартараф этишни ва ҳуқуқингиздан фойдаланишга имконият беришни талаб қилган ҳолда ДСҚга мурожаат қилишингизни маслаҳат берамиз.