Корхонангиз “Махсус инвестиция устама ҳақини «Ўзбекнефтгаз» МХКнинг махсус счётига ўтказиш тартиби тўғрисидаги” Низомга асосан (Ўзбекистон Республикаси Молия вазирлиги, Иқтисодиёт вазирлиги ва Давлат солиқ қўмитасининг 2013 йил 12 мартдаги 26, 25, 2013-12-сон қарори билан тасдиқланган, АВ томонидан 2013 йил 12 апрелда 2451-сон билан рўйхатга олинган Низом) барча турдаги солиқлар ва бошқа мажбурий тўловларни ўрнатилган тартибда тўлайди. Бунда ягона солиқ тўловини тушумдан транспорт воситалари учун сиқилган газни ишлатганлик учун олинадиган солиқни чегирган ҳолда тўлайди.
Махсус инвестиция устама ҳақи — миқдори Ўзбекистон Республикаси Президентининг қарорлари билан тасдиқланадиган, табиий газ етказиб берувчи томонидан автомобилларни газ билан тўлдириш компрессор станцияларига сотиладиган табиий газнинг улгуржи-сотиш нархига қўйиладиган устама бўлиб, ЯСТни ҳисоблаб чиқаришда солиқ солинадиган базадан чегирилмайди.
Ўзбекистон Республикаси Президентининг 2014 йил 4 декабрдаги ПҚ-2270-сон қарорига 10-2-иловага асосан пластик карталар қўлланган ҳолда тушган тушум ҳажми бўйича ўрнатилган ставкалар 5 фоизга камайтирилади.
Агар корхонангизда Ягона солиқ тўловини ер солиғининг уч бараваридан кам бўлмаган миқдорида тўлаш тартиби қўлланилса, Сиз Ягона солиқ тўловининг энг кам миқдори киритилиши муносабати билан ягона солиқ тўловини ҳисоблаб чиқариш ва тўлаш тартиби тўғрисидаги Низомга (Ўзбекистон Республикаси Молия вазирлиги, Иқтисодиёт вазирлиги ва Давлат солиқ қўмитасининг 2011 йил 2 февралдаги 5, 4, 2011-4-сон қарори билан тасдиқланган, АВ томонидан 2011 йил 3 мартда 2203-сон билан рўйхатга олинган Низом) амал қилишингиз лозим бўлади.
Қайси ер участкаларига бўлган мулк ҳуқуқи, эгалик қилиш ҳуқуқи, фойдаланиш ҳуқуқи ёки ижара ҳуқуқи йил мобайнида солиқ тўловчига ўтган бўлса, ўша ер участкалари ЯСТнинг энг кам миқдорини ҳисоблаб чиқаришда ер участкаларига тегишли ҳуқуқ вужудга келганидан (яъни кадастр ҳужжати расмийлаштирилган пайтдан эътиборан) кейинги ойдан эътиборан ҳисобга олинади (Низомнинг 5-банди).
Жавоблар улар эълон қилинган санада долзарб ҳисобланади.