Аҳоли билан пулли ҳисоб-китобларни амалга оширишни расмийлаштириш «Юридик шахслар томонидан касса операцияларини амалга ошириш қоидалари» ( 2687-сон билан  22.06.2015й.да руйхатга олинган) ҳамда «фискал хотирага эга бўлган назорат-касса машиналарининг қўлланиш тартиби тўғрисида Низом» (ВМ 17.11.2011й. 306-сон Карорига 1-Илова) га мувофиқ тартибга солинади.

Назорат-касса машинаси ёрдамида аҳоли билан ҳисоб-китоб қилувчи барча корхоналар харидорга ундан нақд пул қабул қилинганлигини тасдиқловчи НКМ чекини мажбурий тартибда бериши керак. НКМ чеки ҳисобварақ-фактура ўрнини босадиган ҳужжатдир.  (Солик Кодексининг 222-моддаси).

Ҳар иш куни сўнгида ҳар бир НКМ бўйича  Z-ҳисобот ечилиб, ундаги кўрсатгичлар кассир-операциячининг назорат-касса китобига киритилади. Ушбу китоб шакли ва уни тўлдириш тартиби ЎзР АВ 9.01.2012 й. 2309-сон билан ДСҚ Қарори билан  белгиланган.

Кун якунида умумий нақд тушумга битта кирим касса ордери ёзилади. Касса ордерлари кассага топширилгунига қадар ташкилот бухгалтерияси томонидан тегишли равишда Касса кирим ордерларини қайд этиш дафтарида ва Касса чиқим ордерларини қайд этиш дафтарида рўйхатга олиш лозим.

Бундан ташкари, накд пул кирим ва чикими касса дафтарида қайд этилади. Қоидага асосан, корхона бўйича битта касса дафтари юритилишини талаб қилинади. Кассир унга ҳар бир ордер ёки пул маблағлари кирими ва чиқимини тасдиқловчи ҳужжат асосида қайдлар киритади. Ҳар куни  иш куни охирида кассир кассадаги нақд пулларнинг иш куни бошига қолдиғини ёзади,  бир кунлик операциялар ҳисобини чиқаради ва кассадаги нақд пуллар қолдиғини кейинги иш кунига ўтказади.

Касса дафтари тўғри юритилишини корхона бош бухгалтери назорат қилади.

«Юридик шахслар томонидан касса операцияларини амалга ошириш қоидалари» га киритилган ўзгаришларга келсак, эътиборни шунга қаратиш керакки, янги таҳрирда касса бўйича бирламчи ҳужжатлар бўлиб кирим ва чиким касса ордерлари хизмат қилиши аниқлаштирилган.

Ундан ташқари, эски таҳрирда касса ҳужжатларида имзо қўйиш ҳуқуқига эга шахсларга ва бухгалтерларга кассир вазифасини адо этиш таъқиқланган эди. Янги таҳрирдаги Қоидалар тасдиқлангач, штат жадвалида кассир мансаби белгиланмаган ташкилотларда кассир вазифасини Раҳбар буйруғига асосан ҳар қандай шахсга, жумладан бухгалтерга ҳам юклатилиши мумкин.