Ҳа, Сиз имтиёзли шартларда олиб кирилган ва имтиёзлардан фойдаланиш шартларига йўналтирилмаган хом – ашё ва материаллар бўйича божхона тўловларини қайта ҳисобга олиб, тўлаб беришингиз керак.

Ўзбекистон Республикаси Президентининг 21.02.2008 й. ПҚ-800-сон "Хорижий инвестициялар иштирокида "Женерал Моторс Ўзбекистон" корхонасини барпо этиш тўғрисида"ги Қарорининг 8-банди тўртинчи хатбошида назарда тутилганки, "Женерал Моторс Ўзбекистон" ЁАЖ, "Ўзавтосаноат" АК, шунингдек 1-иловага*мувофиқ рўйхат бўйича "Женерал Моторс Ўзбекистон" ЁАЖ автомобилларини ишлаб чиқаришда ишлатиладиган бутловчи буюмлар, материаллар ва технологик жиҳозлар ишлаб чиқарувчи бошқа корхоналар томонидан олиб келинадиган маҳсулотлар божхона тўловлари (божхона расмийлаштируви йиғимларидан ташқари) тўлашдан озод қилинганлар.

Яъни, олиб келинган товарлар фақат "Женерал Моторс Ўзбекистон" ЁАЖ автомобилларини ишлаб чиқаришда ишлатиладиган бутловчи буюмлар ишлаб чиқаришда фойдаланилса божхона тўловлари бўйича имтиёздан фойдаланиш мумкин.

ЎзР Божхона кодексининг 320-моддасида товар чиқариб юборилганидан кейин божхона тўловларининг суммалари қўшимча тўланишига олиб келадиган асослар юзага келган бўлса унинг божхона қийматига ва (ёки) божхона тўловларига тузатишлар киритилиши назарда тутилган.  Агар товарнинг божхона қийматига ва (ёки) божхона тўловларига тузатишлар киритиш божхона тўловларини тўлаш бўйича қарздорликнинг пайдо бўлишига олиб келган бўлса, ана шу қарздорлик суммасига Божхона кодексининг 349-моддасида назарда тутилган тартибда пеня ҳисобланади.

Товарнинг божхона қийматига ва (ёки) божхона тўловларига тузатишлар киритиш қайси товарнинг божхона қийматига ва (ёки) божхона тўловларига тузатишлар киритилаётган бўлса, фақатгина ўша товарга нисбатан амалга оширилади.

Товарнинг божхона қийматига ва (ёки) божхона тўловларига тузатишлар киритиш декларант ёки божхона брокери томонидан божхона органига товарнинг божхона қийматига ва (ёки) божхона тўловларига тузатишлар киритиш шаклини тақдим этиш орқали маълум қилинади, бу шакл божхона декларациясининг ажралмас қисми бўлиб, унинг маълумотларига товарнинг божхона қиймати ва (ёки) божхона тўловлари бўйича тузатишлар киритилади.

Божхона  қийматига тузатишлар киритиш шаклини тўлдириш тартиби “КТС-1 ва КТС-2 божхона қийматига тузатишлар киритиш бўйича Йўриқнома”да (20.04.2000й. 920-сон билан рўйхатга олинган)   келтирилган.

Шундай қилиб, ПҚ № 800 га асосан имтиёзли шартларда олиб кирилган ва имтиёзлардан фойдаланиш шартларига йўналтирилмаган хом – ашё ва материаллар бўйича сизнинг корхонангиз ўзи ёки декларант (брокер) орқали дастлабки божхона декларациясига КТС расмийлаштириб, божхона тўловларини қайта ҳисоблаб, уларни пеняни ҳисобга олган ҳолда тўлаши керак бўлади.