1. Навоий вилоятидаги хусусий корхонанинг юридик шахс номига Тошкент шаҳридан турар жой биноси сотиб олиши тартиби қандай? 2. ЯСТ тўловчи юридик шахснинг номига олинган турар жой биносидан қанақа солиқлар тўланади? Ундан хизмат сафарига юборилган ходимлар фойдаланса солиқ оқибатлари келиб чиқадими?

Саволнинг ID си: 8249

Ягона солиқ тўловчиси бўлган хусусий корхонанинг юридик манзили ва фаолият кўрсатиш жойи Навоий вилоятида. Хусусий корхона эгаси ходимларнинг хизмат сафари даврида фойдаланиши учун юридик шахс номига Тошкент шаҳридан турар жой харид қилишни режалаштиряпти.

Экспертларнинг жавоблари:

30.03.2017 йил санасидаги жавоб
29.03.2017 йил санасидаги жавоб

Турар жой объекти олди-сотди битимини амалга ошириш учун авваломбор сотувчи ва харидор ўртасида нотариал тарзда расмийлаштириладиган (Уй-жой кодекси 14-м.), ёзма шаклдаги олди-сотди шартномаси тузилиши лозим (ФК 480-м.) ва унинг асосида вужудга келган мулк ҳуқуқи давлат рўйхатидан ўтказилиши керак (ФК 111-м.).

Яъни, оддий қилиб айтганда нотариал идорада шартнома тузилганидан кейин бир ойлик муддатдан кечиктирмасдан, кадастр ишини илова қилган ҳолда мулк ҳуқуқини давлат рўйхатидан ўтказиш тўғрисидаги ариза билан ер тузиш ва кўчмас мулк кадастри корхонасининг «ягона дарча» бўлимига мурожаат қилиш лозим (07.01.2014 й. 1-сонли ВМҚ 1-сонли ил. 8-б.). Ариза ҳамда кадастр ишини, шунингдек, электрон документ шаклида телекоммуникация каналлари орқали жўнатиш ҳам мумкин (07.01.2014 й. 1-сонли ВМҚ 1-сонли ил. 2-бўл.).

Давлат рўйхатидан ўтказиш учун керак бўладиган бошқа ҳужжатлар, рўйхатдан ўтказувчи корхона томонидан мустақил равишда, ариза берувчини жалб этмаган ҳолда йиғилади (07.01.2014 й. 1-сонли ВМҚ 1-сонли ил. 8-1-б.).

2. Ягона солиқ тўлови жами умумбелгиланган солиқлар ва бошқа мажбурий тўловларнинг ўрнига тўланади (СКнинг 348-моддаси 3-қисми). ЯСТ тўловчи юридик шахснинг номига олинган турар жой биносидан мол-мулк солиғи тўланмайди.

ЯСТ тўловчилари ЯСТни Солиқ кодексида белгиланган тартибда ва тасдиқланган ставкалар бўйича, лекин энг кам миқдордан - эгаллаб турган ер майдонидан келиб чиқиб, ҳисоблаб чиқарилган ер солиғининг уч бараваридан кам бўлмаган миқдорда тўлайдилар (АВ рўй. №2203 03.03.2011й.). Шунинг учун корхона номига олинган турар жой биноси эгаллаб турган ер майдони ЯСТнинг энг кам миқдорини аниқлашда инобатга олиниши керак.

Агар юридик шахснинг номига олинган турар жой биносидан ушбу юридик шахснинг хизмат сафарига юборилган ходимлари фойдаланса, унда юридик шахсда ва унинг ходимларида солиқ мажбуриятлари келиб чиқмайди.

Агарда юридик шахс ўз номидаги турар жой биносини бошқа шахсларга ижарага берса, унда ижара тўловлари суммаси корхонанинг бошқа даромадлари сифатида ялпи тушум таркибига қўшилган ҳолда асосий (соҳа) фаолият тури учун белгиланган ЯСТ ставкалари бўйича солиққа тортилиши лозим (СКнинг 132, 353-моддалари).

Экспертларнинг жавоблари уларнинг фикрларини акс эттиради ва Сиз мустақил қарор қабул қилишингиз учун ахборот асосини яратади. Ушбу сервисдан фойдаланишда Сиз сайт орқали савол бера туриб, уларга рози бўлган қоидаларга амал қилинади. Барча савол ва жавобларни эркин кўриш мумкин.
Жавоблар улар эълон қилинган санада долзарб ҳисобланади.

Ўртоқлашиш:

– Ўзбекистон кадрлар бўлими ходимлари учун тавсиялар ва маслаҳатларнинг маълумотлар базаси