1.Корхонангиз ходимлар сони бўйича микрофирма ҳисобланади.

Агар корхонангиз давлат рўйхатидан ўтказилган кундан эътиборан 15 кундан кечиктирмай ягона солиқ тўловини тўлашга ўтиши тўғрисида ҳисобда турган жойидаги давлат солиқ идорасига белгиланган шаклда хабарнома берган бўлса, корхонангиз ЯСТ тўловчиси бўлиб ҳисобланади.

Солиқ солишнинг соддалаштирилган тартибни қўллаётган солиқ тўловчилар учун, тўлов манбаида солиқларни ва бошқа мажбурий тўловларни ушлаб қолиш мажбуриятлари, ҳамда бюджетга ва давлат мақсадли жамғармаларига айрим солиқлар ва бошқа мажбурий тўловларни тўлаш мажбуриятлари сақланиб қолади. Улар жумласига иш ҳақидан тўланадиган жисмоний шахслар олинадиган даромад солиғи, мажбурий суғурта бадаллари ва ягона ижтимоий тўлов ҳам киради.

Корхонангиз агрофирма сифатида давлат рўйхатидан ўтган бўлсада, унинг амалга ошираётган фаолияти улгуржи савдо, тайёрлов фаолияти ёки воситачилик фаолияти бўлиши мумкин. Фаолият турини аниқлаш кўпинча хўжалик субъектлари ўртасида тузиладиган шартномаларнинг мазмуни ва предметига боғлиқ.

ВМнинг 04.03.2017й. 119-сон Қарорига мувофиқ, агрофирмалар ташкил этилишидан мақсад - қишлоқ хўжалиги маҳсулотларини харид қилиш, фермер, деҳқон хўжаликлари ва аҳоли хонадонларини зарур ресурслар билан таъминлашдир.

Қарорга кўра қуйидагилар агрофирма фаолиятининг асосий йўналишлари этиб белгиланган:

• деҳқон хўжаликлари ва хонадон эгаларининг буюртмаларига мувофиқ лимон ўстириш учун иссиқхоналар ва парранда боқиш учун қафасларни марказлашган ҳолда қуриб бериш ва тайёр ҳолда хонадон эгаларига топшириш. Солиқ солиш мақсадида – қурилиш фаолияти сифатида қаралади.
• парранда боқиш истагини билдирган ҳар бир хонадон учун ёши 90 кунликдан катта бўлган 100 бош паррандаларни етказиб бериш.
• лимон, унаби ва грек ёнғоғи кўчатларини олиб келиб экиб бериш, агротехникаси ва касалликларга қарши курашиш бўйича амалий ёрдамлар кўрсатиш ҳамда барча зарурий моддий-техника ресурслари ва ем маҳсулотларини етказиб берувчи савдо шохобчаларини ташкил этиш.
• деҳқон хўжаликлари ва аҳоли томорқа ер участкаларида етиштирилаётган қишлоқ хўжалиги маҳсулотлари, шу жумладан, лимон, унаби, ёнғоқ ва парранда маҳсулотларини харид қилиш, тайёрлаш, қайта ишлаш, сотиш ва экспорт қилиш.

Сўнгги учта бандда келтирилган фаолиятлар билан шуғулланувчи корхонанинг фаолият тури хўжалик шартномалари шартларидан келиб чиқиб солиқ солиш мақсадида савдо, тайёрлов ёки воситачилик фаолияти деб қаралади.

Яъни, санаб ўтилган фаолиятларнинг бирорта турини амалга оширувчи корхона ушбу қарорда назарда тутилган агрофирма деб ҳисоблансада, у солиққа тортиш мақсадида санаб ўтилган фаолиятлардан бирини (ёки бир нечтасини) амалга оширувчи корхона бўлади.

Хулоса қилиб айтганда, корхонангиз дастлаб фаолият турини аниқлаб олиши зарур.

Кичик бизнес субъекти сифатида белгиланган муддатда (СКнинг 351-моддаси) ЯСТ тизимини қўллашингиз ҳақида солиқ органларини хабардор этмаган бўлсангиз, унда умумбелгиланган солиқларни тўлашингиз ва тегишли ҳисоботларни топширишингиз зарур бўлади. Уларнинг рўйхати билан бу ерда танишишингиз мумкин:

http://kadrovik.uz/question/7964;

http://kadrovik.uz/question/2495;

Агарда корхонангизни асосий фаолияти савдо фаолияти бўлса, унда ходимларнинг сонидан қатъи назар корхонангиз ягона солиқ тўловини тўлаши лозим бўлади (СКнинг 350-моддаси). 

Агар корхонангиз умумбелгиланган солиқдан ЯСТга ўтмоқчи бўлса, буни қандай амалга ошириш тўғрисида бу ерда ўқишингиз мумкин:

http://kadrovik.uz/question/8795;

2.ВМнинг 04.03.2017й. 119-сон Қарорида солиқ имтиёзлари назарда тутилмаган.

Аммо Қарорда белгиланган фаолиятларни амалга оширувчи агрофирмалар учун имтиёзли кредитлар бериш, ҳамда ушбу фаолият учун зарур бўлган белгиланган активларни четдан олиб келиш учун талаб этиладиган маблағларни ўз вақтида конвертация қилиш назарджа тутилган (Қарорнинг 10-банди).

Шунга кўра, корхонангиз юқорида санаб ўтилган фаолиятларни амалга оширса, сиз имтиёзли кредит олиш учун ёки конвертация учун банкка мурожаат этишга ҳақлисиз.