Солиқлар МИБ депозит ҳисобрақами орқали тўланиши қўшимча ҳужжатлар расмийлаштирилишини талаб этмайди ва бухгалтерия ўтказмаларининг ўзгаришига олиб келмайди.

Ўзбекистон Республикаси Бош прокуратураси ҳузуридаги Мажбурий ижро бюроси суд ҳужжатлари ва бошқа органлар ҳужжатларининг мажбурий ижросини таъминлайди (ЎзР Президентининг ПҚ-3016-сон 2017 йил 30 майдаги қарорига 4-илова).

Ўз муддатида тўланмаган солиқлар бюджетга тўғридан тўғри эмас, балки ушбу орган депозит ҳисобрақами орқали тўланиши учун уларнинг МИБ томонидан ундирилиши тўғрисида чиққан суд қарори етарли ҳужжатий асос бўлади. Бу операция бўйича бошқа бирон ҳужжатларни расмийлаштириш талаб этилмайди.

Аммо, амалда бир неча турдаги солиқ қарзлари битта тўлов билан ечиб олиниши ва тўловнинг қанча қисми қайси солиқ қарзини ёпишга йўналтирилганлиги кўринмаганлиги сабабли тўловни ечиб олиш пайтида солиқларни ҳисобга олувчи вақтинчалик субсчет очиш мумкин: масалан 6411 “МИБ орқали ундирилган солиқ бўйича мажбуриятлар”. Тўлов МИБнинг депозит рақамидан солиқ қарзларини қоплашга ўтказилганда, солиқ тўловчининг шахсий карточкасида солиқлар ва бошқа мажбурий тўловларнинг, шунингдек пеня ва жарималарнинг ҳисобланган ҳамда тўланган суммаларини акс эттирилади (СКнинг 69-моддаси). Унда келтирилган маълумотлар асосида вақтинчалик 6411 “МИБ орқали ундирилган солиқ бўйича мажбуриятлар” субсчетдаги тўловларни солиқ турлари бўйича тақсимлашингиз мумкин.