Ҳа, умумий овқатланиш корхонаси буюртмачининг истагига кўра уларнинг хонадонида таом тайёрлаш хизматини амалга ошириши мумкин. Тадбиркорлик фаолияти субъектлари қонун ҳужжатларида тақиқланмаган ҳар қандай фаолиятни амалга оширишга ҳақлилар (“Тадбиркорлик фаолияти эркинлигининг кафолатлари тўғрисида”ги Қонуннинг 8-моддаси).

Бунда буюртмачи ва хизмат кўрсатувчи, яъни сизнинг корхонангиз ўртасида оддий ёзма шаклда шартнома тузиб, унда хизмат кўрсатиш шарти, жойи, масаллиқлар кимнинг ҳисобиданлиги ва нархи, тўлов усули кабилар аниқланиб олиниши керак. Шартнома учун тўловни умумбелгиланган қоидалар асосида терминал ёки нақд равишда қабул қилиб олишингиз мумкин.

Таом тайёрлаш хизмати умумий овқатланиш корхоналари учун белгиланган ставка – 10% лик ставкада ЯСТга тортилади.

Умумий овқатланиш соҳасидаги хўжалик юритувчи субъект – бу умумий овқатланиш соҳасида кулинария, шунингдек бошқа озиқ-овқат маҳсулотларини тайёрлаш, сотиш ва истеъмол қилишни ташкил этиш ҳамда хизматлар кўрсатиш бўйича функцияларни бажарувчи юридик шахсдир (ВМнинг 13.02.2003 й. 75-сон Қарорига 2-илова).