Вазирлар Маҳкамасининг 24.08.2016 йилдаги 275-сон Қарори билан Европа Иттифоқининг иқтисодий фаолият турларини статистик таснифлаши негизида ишлаб чиқилган Ўзбекистон Республикаси Иқтисодий фаолият турларининг умумдавлат таснифлагичига (кейинги ўринларда - ИФУТ) ўтиш тўғрисида Карор қабул қилинди.

Давлат бошқаруви органларининг идоралараро ўзаро ҳамкорлигида, статистика, солиқ ва молиявий ҳисобот шаклларида ИФУТдан мажбурий тартибда фойдаланилади. Бунинг учун юридик шахслар тўғрисидаги ахборотларни сақловчи ва улар билан ишловчи давлат органларининг ахборот тизимлари ва ресурсларида ИФУТ "Электрон ҳукумат" тизимининг маълумотномалари ва классификаторлари регистрига киритилади.

ИФУТ асосида Кичик тадбиркорлик субъектларига тегишли бўлган ташкилотларнинг таснифлагичи тасдиқланди. У нотижорат ташкилотларига татбиқ этилмайди. Бир нечта фаолият турини амалга оширадиган (кўп тармоқли) юридик шахслар йиллик оборот ҳажмида қайси фаолият тури мезонлари бўйича улуш катта бўлса, ўша фаолият бўйича кичик тадбиркорлик субъекти ҳисобланадилар. Оилавий корхона иштирокчиларининг ўртача йиллик сони 2 кишидан кам бўлмаслиги керак.

Асосий фаолият тури бўйича ходимларининг ўртача йиллик сони юридик шахсни микрофирмалар ва кичик корхоналар тоифасига киритиш мезони ҳисобланади. Уни аниқлаш борасида 2017 йил N 33 (630) 15 август «Асосий фаолият тури: қачон ва нима учун аниқланади?» мақоламиздан маълумот олишингиз мумкин.