Бир вақтнинг ўзида қуйидаги шартларга жавоб берадиган юридик шахслар солиқ солиш мақсадида қишлоқ хўжалиги товарлари ишлаб чиқарувчилар жумласига киради ва ушбу фаолият тури бўйича ягона ер солиғи тўлашга мажбур (СКнинг 362-моддаси 2-қисми, 363-моддаси 7-қисми):

• асосий фаолият тури ер участкаларидан фойдаланган ҳолда қишлоқ хўжалиги маҳсулотларини етиштириш ва ўзи етиштирган бундай маҳсулотларни қайта ишлаш бўлган ёки асосий фаолият тури фақатгина ер участкаларидан фойдаланган ҳолда қишлоқ хўжалиги маҳсулотларини етиштириш бўлган юридик шахслар;
• қишлоқ хўжалигини юритиш учун маҳаллий давлат ҳокимияти органлари томонидан ўзларига белгиланган тартибда берилган ер участкаларига эга бўлган юридик шахслар;
• қишлоқ хўжалиги маҳсулотларини реализация қилиш умумий ҳажмида қишлоқ хўжалиги маҳсулотини етиштириш ва ўзи етиштирган мазкур маҳсулотни қайта ишлаш улуши камида 50 фоизни ташкил этадиган юридик шахслар. Умумий хажм реализация қилиш ёки қайта ишлаш учун олинган  қишлоқ хўжалиги маҳсулотларини ҳамда юридик шахснинг ўзи етиштирган қишлоқ хўжалиги маҳсулотларини ва ўзи етиштирган қишлоқ хўжалиги маҳсулотни қайта ишлашдан олинган тушумни ўз ичига олади.

Шунга кўра, агар фермер хўжалиги чорва молларини сотиб олиб, маълум муддат давомида чорвани боқиб ўстириб, сўнгра сотса, у ҳолда ягона ер солиғини тўлайди.

Агар чорва моллари сотиб олиниб, боқиб ўстирилмасдан тез орада сотилса, у ҳолда бу савдо фаолияти ҳисобланади. Фермер хўжалиги ушбу фаолият тури бўйича алоҳида ҳисоб юритиши ва ЯСТ тўлаши шарт (СКнинг 363-моддаси 8-қисми). Бунда чорва молларини аҳолига нақд пулга ёки савдо терминаллари орқали сотишда ЯСТнинг чакана савдо учун белгиланган ставкаси қўлланилади. Агар улгуржи сотилса, ЯСТнинг улгуржи фаолият учун белгиланган ставкаси қўлланилади, шу билан биргаликда, фермер хўжалигида улгуржи савдо фаолияти учун лицензия бўлиши талаб этилади (ВМнинг 2002 йил 26 ноябрдаги  407-сонли қарорига илованинг 3-банди). ЯСТнинг савдо фаолияти бўйича 2017 йил учун ставкалари Президентнинг 2016 йил 27 декабрдаги 2699-сонли қарорига 10-2-сонли иловада белгиланган.