Меҳнат дафтарчаси асосий иш жойида сақланади (Меҳнат дафтарчаларини юритиш тартиби тўғрисидаги йўриқноманинг (рўйхат рақами 402, 29.01.1998 й.) 1.6-б. мазмунидан келиб чиқиб).

Иш жойи ходим меҳнат шартномаси асосида меҳнат вазифаларини амалга оширадиган жой ҳисобланади.

1. Докторантурада ўқиш меҳнат стажини берса-да, у ўз-ўзидан асосий иш жойи деб ҳисобланмайди ва унга меҳнат қонунчилиги татбиқ этилмайди. Агар докторант билан олий таълим муассасаси (илмий-тадқиқот муассасаси) ўртасида меҳнат шартномаси тузилмаган бўлса, бу муассаса докторантга меҳнат дафтарчасини юритмайди.

ВМнинг 22.05.2017 й. 304-сон қарорига 2-илованинг 18, 20-бандларига кўра докторантурада ўқишга талабгор меҳнат дафтарчасининг белгиланган тартибда тасдиқланган нусхасини тақдим этиши керак. Агар талабгор ишламаётган бўлса ва меҳнат дафтарчасининг асл нусхасини муассасага топшириб қўйган бўлса, бу муассасада докторантликнинг асосий иш сифатида олиб борилаётганлигини билдирмайди. Меҳнат шартномаси асосида ишга кирмоқчи бўлаётган докторант меҳнат дафтарчасининг нусхасини муассасада қолдириб, меҳнат дафтарчасини қайтариб олишга ҳақли.

2. Агар докторант муассасада меҳнат шартномаси асосида ишлаётган бўлса, тўғри, асосий иш жойи сифатида меҳнат дафтарчаси муассасада сақланиши керак. Бунда докторант ўриндошлик асосида ишга кираётган жойига асосий иш жойидан (муассасадан) маълумотнома тақдим этади (Йўриқноманинг 1.5-б.). Шунингдек, докторант муассаса билан меҳнат шартномасини бекор қилиб, бошқа ташкилотга асосий ишга ўтиши мумкин. Бунда муассаса докторантга меҳнат дафтарчасини бериши керак.