Хизматчиларнинг асосий лавозимлари ва ишчилар касблари классификаторига (Вазирлар Маҳкамасининг 2017 йил 4 октябрдаги 795-сонли қарори билан тасдиқланган) 2-иловада мактаб ўқитувчилари лавозимлари ва уларга таълим даражаси бўйича энг паст (минимал) талаблар кўрсатиб ўтилган. Унга кўра, бошланғич синфлар ўқитувчилари ўрта-махсус касб-ҳунарга доир маълумотли, умумтаълим мактаблари юқори синф ўқитувчилари эса олий маълумотли бўлиши талаби қўйилган.

Бундан ташқари, Классификаторнинг 19-бандига мувофиқ айрим ҳолларда Классификаторда белгиланган маълумотнинг энг паст (минимал) даражасига ёки йўналишига эга бўлмаган, лекин етарли даражада амалий тажрибага эга бўлган, ўзларига юкланган лавозим вазифаларини тўлиқ ҳажмда ва сифатли бажарадиган ходимлар маълумотнинг тегишли даражасини ёки маълумотнинг бошқа йўналишини талаб қиладиган лавозимга қабул қилиниши мумкин.

Юқоридагиларни инобатга олиб, ўрта-махус педагогик маълумотга эга бўлган шахс бошланғич синфларда ўқитувчи лавозимида ишлашга хақли ва шу тоифадаги ўқитувчилар олий маълумотли бўлиши шарт деган талаб раҳбарият томонидан қўйилиши асоссиздир.