Ўриндошлик асосида ҳамда бир неча касбда ва лавозимда ишлаш тартиби тўғрисидаги низом (ВМнинг 2012 йил 18 октябрдаги 297-сонли қарори бмлан тасдиқланган) мулкчиликнинг барча шаклларидаги корхоналарда меҳнат шартномасига мувофиқ ўриндошлик асосида ҳамда бир неча касбда ва лавозимда ишловчи Ўзбекистон Республикаси фуқаролари, шунингдек хорижий фуқаролар ва фуқаролиги бўлмаган жисмоний шахсларга тааллуқли (Низомнинг 1-банди). Шунга асосан хорижий фуқаро ўриндошлик бўйича бошқа корхонада ҳам ишлаши мумкин.

Ўзбекистон Республикасига хориждан ишчи кучини жалб қилиш ва ундан фойдаланиш тартиби тўғрисидаги низомнинг (ВМнинг 2019 йил 25 мартдаги 244-сонли қарори билан тасдиқланган) 4-бандига кўра иш берувчилар томонидан Ўзбекистон Республикасига хориждан ишчи кучини рухсатнома олмай жалб қилиш тақиқланади. Шунингдек, Низомнинг 6-бандига кўра чет эл фуқароларининг Ўзбекистонда тасдиқнома олмасдан меҳнат фаолиятини амалга ошириши тақиқланади.

Низомнинг 2-бандида Низом татбиқ этилмайдиган ҳоллар санаб ўтилган. Шунингдек Низомнинг 4-бандига биноан юқори малакали ва (ёки) малакали мутахассисларни, шунингдек, Президент мактаблари, олий таълим муассасаларида ишлаш учун ўқитувчилар ва мутахассисларни жалб этишда иш берувчининг рухсатнома олиши талаб этилмайди. Қолган ҳолларда эса ўриндошлик бўйича ишлайдиган корхона рухсатнома ва ходим тасдиқнома олиши шарт.