Ҳисоб-рақамга нотўғри мақсад билан кирим қилинган пулнинг мақсадини тузатиш
Агар фермер хўжалигининг мақсади ҳақиқатда устав фондини шакллантириш (ошириш) бўлган бўлса, фермер хўжалиги бошлиғининг бунга мувофиқ қарорлари бўлиши лозим. Шунга кўра қўшимча қарор расмийлаштирилиб, унда банкка кирим қилинган суммалар аслида устав фондига йўналтирилиши керак бўлганлигини ва шундай ҳисобланиши лозимлигини кўрсатинг.
Сўнгра ушбу хатони тузатиш натижаси таъсир қиладиган солиқлар бўйича ҳисоботларни қайта топшириш керак.
Молиявий ҳисоботлар қайта топширилмайди. Улардаги хатоликлар муҳим (жиддий) ёки муҳим эмаслиги (жиддий эмаслиги)га қараб хатолик аниқланган йилда тузатилади (АВда 1998 йил 27 августда 484-сон билан рўйхатга олинган 3-сон БҲМС «Молиявий натижалар тўғрисидаги ҳисобот» 16-17-бандлари). Агар хатолик жиддий бўлса, 8710 «Ҳисобот даврининг тақсимланмаган фойдаси (қопланмаган зарари)» счёти орқали тузатилади. Агар хатолик жиддий бўлмаса, 9340 «Ўтган йиллар фойдалари», 9430 «Бошқа операцион харажатлар» счётлари орқали тузатилади.
Хатонинг муҳим (жиддий) ёки муҳим эмаслиги (жиддий эмаслиги) мезони қонунчилик томонидан белгиланмаган. Ҳар бир корхона буни ўзининг молиявий ҳолатидан келиб чиққан ҳолда белгилайди. Айнан бир сумма бир корхона учун муҳим сумма бўлиши, бошқа корхона учун эса муҳим бўлмаслиги мумкин. Муҳимлик мезонини корхонанинг ҳисоб сиёсатида кўрсатиб ўтиш керак.
Агар пул маблағлари фермер хўжалигининг банкдаги ҳисоб-рақамига ҳақиқатда кирим қилинмаган маҳсулотларни сотиш натижасида келиб тушган бўлса, солиқ текширувида солиқлар қўшимча ҳисобланиши, фермер хўжалиги ва унинг мансабдор шахсларига нисбатан санкциялар қўлланилиши мумкин.
Жавоблар улар эълон қилинган санада долзарб ҳисобланади.