Шўъба корхонасидаги улуш олди-сотди шартномаси бекор қилинишининг ҳисоби ва солиқ оқибатлари
Саволнинг ID си: 19034
Корхонамиз 2019 йилда ўзига тегишли шўъба корхонадаги улушини баҳолаб бошқа корхонага 7 йил муддатга график асосида бўлиб тўлаш шарти билан сотган. Ушбу олди-сотди шартномаси шартига кўра харидор томонидан 2 млрд.сўм бўнак тўлови тўлангандан кейин улушни далолатномага асосан топширганмиз ва корхонамиз шўъба корхона таъсисчилигидан чиққан. Далолатнома расмийлаштирилган ва устав қайтадан руйхатдан ўтган кундан бошлаб улушни сотишдан 6 млрд.сўм ижобий сальдо даромад сифатида тан олинган ҳамда солиқ тўланган. 2020 йилда ушбу улушни олди-сотди шартномаси харидор ўз мажбуриятларини бажара олмаганлиги туфайли бекор қилинди. Улушимиз қайтариб олиниб таъсисчи сифатида уставни яна қайтадан рўйхатдан ўтказдик. 2 млрд.сўм бўнак харидорга қайтариб берилмаслигига келишилди.
1. Ушбу юзага келган вазиятда 2020 йилги молиявий ҳисоботларда 4 млрд.сўмни (6 млрд.сўм – 2 млрд.сўм) зарар деб тан олишимиз керакми?
2. Бу бўйича қандай бухгалтерия ўтказмалари амалга оширилади? Солиқ оқибатлари қандай?
Экспертларнинг жавоблари:
1.Шўъба корхонадаги улушни олди-сотди шартномаси бекор қилинган, улуш қайтариб олинган. Корхонангиз зарар кўраётгани йўқ. Аксинча, 2 млрд.сўмли бўнакни харидорга қайтармаганлиги сабабли фойда кўрмоқда.
2.Улуш сотилиши тўғрисидаги шартнома бекор қилинганида аввал амалга оширилган ўтказмалар сторно ўтказмалар билан тузатилади. 2 млрд.сўм миқдоридаги бўнак харидорга қайтарилмаганлиги сабабли бу сумма 9390 «Бошқа операцион даромадлар» счётининг кредитида акс эттирилади.
Корхона 2019 йилда улушни сотганида ҚҚС ва фойда солиғини ҳисоблаб тўлаган бўлса, 2020 йилда шартнома бекор қилинганида ушбу солиқларни корректировка қилади (СК 257-моддаси 1-қисми 1-банди, СК 332-моддаси 2-қисми 1-банди).
2 млрд.сўм миқдоридаги бўнакни даромадга олганлиги сабабли, фойда солиғини базасини ҳисоблашда бу суммани жами даромадлар таркибига киритиши лозим (СК 297-моддаси 3-қисми 12-банди).
Экспертларнинг жавоблари уларнинг фикрларини акс эттиради ва Сиз мустақил қарор қабул қилишингиз учун ахборот асосини яратади. Ушбу сервисдан фойдаланишда Сиз сайт орқали савол бера туриб, уларга рози бўлган
қоидаларга
амал қилинади. Барча савол ва жавобларни эркин кўриш мумкин.
Жавоблар улар эълон қилинган санада долзарб ҳисобланади.
Телеграм канали 