ВМнинг 18.03.1996 йилдаги 103-сон қарорининг 3-бандига асосан, меҳнатга ҳақ тўлашнинг ягона тариф сеткасини қўллаш барча бюджет ташкилотлари учун мажбурийдир. Давлат корхонаси бўлмаган корхоналарда, шу жумладан хусусий корхонада ягона тариф сеткасини қўллаш мажбурий эмас.

Шунингдек юқоридаги қарорнинг 3-бандига кўра, тариф-малака разрядларини меҳнатга ҳақ тўлашнинг ягона тариф сеткаси асосида белгилаш ўз молиявий фаолиятини хўжалик ҳисоби асосида амалга оширувчи барча давлат ва давлат-акционерлик корхоналари ва ташкилотлари учун мажбурийдир. Мулкчиликнинг бошқа шаклларидаги корхоналар, ташкилотлар ва муассасаларга ходимларнинг тариф-малака разрядларини (тариф коэффициентлари) ягона тариф сеткаси асосида белгилаш тавсия этилади, яъни мажбурий эмас.

Юқоридагилардан келиб чиқиб, давлат корхонаси бўлмаган корхоналарда ходимлар учун разрядлар ва тариф коэффициентларини мустақил белгилаш мумкин.

Айтиб ўтиш керакки, хусусий ва бошқа нодавлат корхоналар ягона тариф сеткасини умуман қўлламасликка ҳақли. Муҳими, иш ҳақлари қонун ҳужжатларида белгиланган меҳнатга ҳақ тўлашнинг энг кам миқдоридан кам бўлмаслиги керак.