Ходимни бошқа лавозим бўйича доимий ишга ўтказишга фақат унинг розилиги билан йўл қўйилиши мумкин.

Агар объектив сабабларга кўра (технологиядаги, ишлаб чиқариш ва меҳнатни ташкил этишдаги ўзгаришлар, ходимлар сони (штати) ёки иш хусусиятининг ўзгаришига олиб келган ишлар ҳажмининг қисқарганлиги ёхуд корхонанинг тугатилганлиги (МК 100-м. 2-қ. 1-б.), ходимнинг малакаси етарли бўлмаганлиги ёки соғлиғи ҳолатига кўра бажараётган ишига нолойиқ бўлиб қолиши (МК 100-м. 2-қ. 2-б.), корхона раҳбари, унинг ўринбосарлари, бош бухгалтер билан тузилган меҳнат шартномаси мулкдорнинг алмашиши сабабли бекор қилинганлиги (МК 100-м. 2-қ. 6-б.), шу ишни илгари бажариб келган ходимнинг ишга тикланганлиги (МК 106-м. 2-б.)) ходим ўз ишини бажаришни давом эттира олмаса, иш берувчи ходимга мутахассислиги ва малакасига мувофиқ келадиган ишни, бундай иш бўлмаган тақдирда эса корхонада мавжуд бўлган бошқа ишни таклиф этиши шарт (МК 92-м.).

Юқорида кўрсатилганлардан бошқа ҳолларда болани парваришлаш таътилидан чиққан ходим бошқа лавозимга доимий ишга иш берувчи билан келишилган ҳолда (исталган кундан бошлаб) ўтказилиши мумкин.

Ходимнинг вақтинча бошқа ишга ўтказиш ҳақидаги илтимоси, агар бу илтимос узрли сабаблар туфайли келиб чиққан ва бундай иш корхонада мавжуд бўлса, иш берувчи томонидан қаноатлантирилиши керак. Вақтинча бошқа ишга ўтказиш учун узрли сабаблар рўйхати, шунингдек бошқа ишга ўтказилганда меҳнатга ҳақ тўлаш тартиби жамоа шартномасида белгилаб қўйилиши мумкин, агар бундай шартнома тузилмаган бўлса, - иш берувчи томонидан ходимларнинг вакиллик органи билан келишиб белгиланади. Болани парваришлаш таътилидан чиққан аёл соғлиғи ҳолатига кўра ёки 2 ёшга тўлмаган боласи бор бўлса, унинг талабига кўра енгилроқ ёки ноқулай ишлаб чиқариш омилларининг таъсиридан ҳоли бўлган ишга вақтинча ўтказилиши керак (МК 94-м.).