Вазирлик, давлат қўмиталари ҳузуридаги давлат бошқаруви органлари (масалан, Давлат солиқ қўмитаси ҳузуридаги Кадастр агентлиги, Монополияга қарши курашиш қўмитаси ҳузуридаги Истеъмолчилар ҳуқуқларини ҳимоя қилиш агентлиги, Адлия вазирлиги ҳузуридаги Интеллектуал мулк агентлиги ва ҳ.к.) бошқарув ходимларининг чекланган сони Ўзбекистон Республикаси Президенти қарорлари билан тасдиқланади. Одатда, бундай қарорларда давлат бошқаруви органи раҳбарига (юқори турувчи ташкилот ва/ёки Вазирлар Маҳкамаси билан келишган ҳолда) ёки юқори турувчи ташкилот раҳбарига бюджетдан ташқари маблағлар ҳисобидан қўшимча штат бирликларини жорий этиш ҳуқуқи берилади (2020 йил 7 сентябрдаги ПҚ-4819-сонли Президент қарори 7-б., 2019 йил 11 сентябрдаги ПФ-5817-сонли Президент Фармони 6-б., 2019 йил 1 июлдаги ПҚ-4380-сонли Президент қарори 1-б.).
Шундан келиб чиқиб, юқори турувчи вазирлик билан келишган ҳолда бюджетдан ташқари маблағлар ҳисобидан ташкилотингиз штатига техник назорат бўйича мутахассис лавозими киритилиши мумкин.
Шу билан бирга, қонун ҳужжатларида техник назорат бўйича ишларни бажариш учун шахсни фуқаролик-ҳуқуқий тусдаги шартнома асосида жалб этиш тақиқланмаган. Фикримизча, бундай ҳолатда ҳам шахсни жалб этиш юқори турувчи вазирлик билан келишилиши лозим. Фуқаролик-ҳуқуқий тусдаги шартнома бўйича харажатлар АВ томонидан 2014 йил 15 декабрда 2634-сон билан рўйхатга олинган Низомга мувофиқ тасдиқланади. Бунда харажатларни асослаш учун давлат органлари ҳузуридаги буюртмачи хизматларида техник назорат соҳасидаги мутахассисларга қўлланиладиган меҳнатга ҳақ тўлаш тартибига (ВМнинг 2021 йил 20 майдаги 321-сонли қарорининг 9-б.) таянишни тавсия этамиз.
Бундан ташқари, “Давлат харидлари тўғрисида”ги Қонунга мувофиқ давлат буюртмачилари фуқаролик-ҳуқуқий тусдаги шартномани давлат харидлари портали орқали тузади. Кўрсатилган Қонуннинг 71-моддасида ва 2018 йил 27 сентябрдаги ПҚ-3953-сонли Президент қарорига иловада тўғридан-тўғри шартномалар бўйича харид қилинадиган товарлар (ишлар, хизматлар) рўйхати келтирилган. Ушбу рўйхатда техник назорат бўйича ишлар мавжуд эмас.
Эслатиб ўтамиз, 2019 йил 1 мартдан бошлаб қурилаётган объектлар устидан техник назорат фақат белгиланган тартибда сертификат олган мутахассислар томонидан амалга оширилади (2018 йил 14 ноябрдаги ПФ-5577-сонли Президент Фармони 1-б. “в” кичик банди.).
Жавоблар улар эълон қилинган санада долзарб ҳисобланади.