Иш вақти режими (кундалик иш вақтининг (сменанинг) муддати, ишнинг бошланиш ва тугаш вақти, ишдаги танаффуслар вақти, сутка давомидаги сменалар сони, иш кунлари ҳамда ишланмайдиган кунларнинг навбат билан алмашиниши, ходимларнинг сменадан сменага ўтиш тартиби) корхонада ички меҳнат тартиби қоидалари, бошқа локал норматив ҳужжатлар билан, бу ҳужжатлар бўлмаганда эса ходим билан иш берувчининг келишувига биноан белгиланади (МКнинг 120-м.).

Ходимнинг иш вақтида иш жойида бўлмаслиги ички меҳнат тартиби қоидаларига асосан меҳнат интизомининг бузилиши деб ҳисобланиши мумкин ва ушбу ҳолат бўйича иш берувчи интизомий жазо чораларини қўллашга ҳақли.

Сиз айтиб ўтган бошқа корхонанинг ҳаракатларига тўхталсак, ишга қабул қилиш ҳуқуқига эга бўлган мансабдор шахс томонидан ёки унинг ижозати билан ходимга ҳақиқатда ишлашга рухсат этилган бўлса, ишга қабул қилиш тегишли равишда расмийлаштирилган ёки расмийлаштирилмаганлигидан қатъи назар, иш бошланган кундан эътиборан меҳнат шартномаси тузилган деб ҳисобланади (МКнинг 82-м. 6-қ.).

Шунга кўра, Сиз ушбу ҳолатда ходимларингиз учун ҳақиқатда амал қилувчи иш режимини белгилашингиз мумкин. Ўз навбатида, бошқа корхона ушбу ходимларни Вазирлар Маҳкамасининг 2012 йил 18 октябрдаги 297-сон қарори билан тасдиқланган Ўриндошлик асосида ҳамда бир неча касбда ва лавозимда ишлаш тартиби тўғрисидаги низом асосида ўриндош сифатида ишга олиши лозим.

Шу билан бирга, давлат органи, давлат иштирокидаги ташкилот ёки фуқароларнинг ўзини ўзи бошқариш органи мансабдор шахсининг ғаразгўйлик ёки бошқа манфаатларни кўзлаб расмий ҳужжатларга била туриб сохта маълумотлар ва ёзувлар киритиши, ҳужжатларни қалбакилаштириши ёки била туриб сохта ҳужжатлар тузиши ва тақдим этиши мансаб сохтакорлиги ҳисобланади ва Жиноят кодексининг 209-моддасида назарда тутилган жавобгарликни келтириб чиқаради.

Шу билан бирга, ходимлар  корхоналар ўртасида тузилган хизмат кўрсатиш шартномаси асосида  бошқа корхонага хизмат кўрсатишлари  мумкин, бунда кунлик табелда уларга тўлиқ иш вақти қўйилади.