Ходимнинг розилигисиз меҳнат ҳақидан ушлаб қолинадиган ҳоллар қуйидагилар:

1) солиқлар ва бошқа мажбурий тўловларни ундириш учун;

2) ижро ҳужжатларини ижро этиш учун;

3) иш ҳақи ҳисобига, хўжалик эҳтиёжларига, хизмат сафарларига ёки бошқа жойдаги ишга ўтганлиги муносабати билан берилган бўлиб, сарф қилинмай қолган ва ўз вақтида қайтарилмаган авансни ушлаб қолиш учун ҳамда ҳисоб-китобдаги хатолар натижасида ортиқча тўланган суммани қайтариб олиш учун;

4) иш йили тугамасдан олдиндан таътил олиб туриб меҳнат шартномаси бекор қилинганда, - таътилнинг ишланмаган даврга тегишли кунлари учун;

5) ходим томонидан иш берувчига етказилган зарарни қоплаш учун, агар етказилган зарарнинг миқдори ходимнинг ўртача ойлик иш ҳақидан ортиқ бўлмаса;

6) интизомий жазо сифатида ойликнинг 30 фоизидан ошмаган жаримани ундириш учун.

Иш ҳақини ҳар гал тўлаш вақтида ушлаб қолинадиган ҳақнинг умумий миқдори ходимга тегишли бўлган меҳнат ҳақининг эллик фоизидан ортиб кетмаслиги лозим (МК 164 м.).

Агар ушлаб қолинаётган сумманинг умумий миқдори меҳнат ҳақининг 50 фоизидан ортадиган бўлса, ушбу ортаётган сумма кейинги иш ҳақидан ушлаб қолиниши мумкин. Мисол учун, ходим томонидан корхонага 1 000 000 сўмлик зарар етказилган. Иш ҳақи 2 000 000 сўмга тенг. Ушлаб қолинадиган солиқлар ва етказилган зарарнинг умумий суммаси 1 000 000 сўмдан ошиб кетиши мумкин эмас. ЖШДС суммаси 12 фоизни, яъни 240 000 сўмни ташкил этади ва ушлаб қолинадиган зарар суммаси 760 000 сўмдан ошиб кетиши мумкин эмас. Шу билан бирга, етказилган зарарнинг қолган 240 000 сўмини ходим ихтиёрий равишда шу ойнинг ўзида тўлаб юбориши мумкин. Бунда сумманинг қолган қисмини ҳам ушлаб қолиш тўғрисида ариза ёзади.