Ишни ўқиш билан бирга олиб бораётган ходимларга кафолатлар ва компенсациялар биринчи марта тегишли даражадаги таълим олаётганда берилади (МК 386-м.). Яъни, агар ходим бир ўқишни битириб, худди шу даражадаги бошқа ўқишга кирган бўлса, бу ҳолда иккинчи ўқиш бўйича Меҳнат кодексида назарда тутилган кафолатлар ва компенсациялар (ўртача иш ҳақи сақланган ҳолда ўқув таътили) берилмайди. Коллеж ва техникумда олинадиган таълим профессионал таълимга киради. Коллежларда ўрта профессионал таълим берилади ва у умумий ўрта, ўрта махсус таълим ҳамда бошланғич профессионал таълим негизида амалга оширилади. Техникумларда эса ўрта махсус профессионал таълим берилади ва у умумий ўрта, ўрта махсус, бошланғич профессионал ва ўрта профессионал таълим негизида амалга оширилади (“Таълим тўғрисида”ги Қонуннинг 10-м.). Шунга кўра, коллеждаги таълим ва техникумдаги таълим иккита ҳар хил даражадаги таълим ҳисобланади.

Юқоридагилардан келиб чиқиб, саволда кўрсатилган ҳолатда ходим коллеждан кейин техникумда ўқиса, МКнинг 385-моддасида кўрсатилган ўртача иш ҳақи сақланган ҳолда ўқув таътили берилиши керак.