Хомиладорлик ва туғиш бўйича нафака качон давлат томонидан тулаб берилади
Бюджет ташкилотларидан ташқари барча юридик шахсларда охирги 6 ой давомида узлуксиз иш стажига эга бўлган аёлларга минимал истеъмол харажатлари (МИХ) миқдоридан келиб чиққан ҳолда Давлат бюджети маблағлари ҳисобидан ҳомиладорлик ва туғиш нафақаси тўланади (07.03.2022 йилдаги ПФ-87-сонли Президент Фармони 2-б.).
Нафақа олувчининг охирги 6 ой давомидаги узлуксиз иш стажини ҳисоблашда, "ЯММТ" ИДАКдаги бюджет ташкилотларидан ташқари юридик шахсларда меҳнатга лаёқатсизлик варақаси расмийлаштирилган кунга қадар 6 ой узлуксиз иш стажи инобатга олинади. Бунда ушбу даврда 31 кундан кўп бўлмаган танаффуслар бўлганда, меҳнатга лаёқатсизлик варақаси расмийлаштирилган кундан олдинги ўн икки ой давомидаги кетма-кет даврлар иш стажини ҳисоблашда қўлланилади. Агар охирги 6 ой давомидаги узлуксиз иш стажи даврида ходимнинг меҳнатга ҳақ тўлаш тарзидаги даромадлари мавжуд бўлмаса, ушбу давр иш стажини ҳисоблашда инобатга олинмайди.
Болани парваришлаш учун таътилда бўлган аёлнинг иш стажини ДСҚ базаси орқали текширишда унинг таътилга чиқишидан олдинги даври ҳисобга олинади (ВМнинг 20.09.2022 йилдаги 515-сонли қарорига 1-илова 14-б.).
Шуларга асосан, агар ходим ишга киришдан олдин 31 кун давомида ишламаган бўлиб, 05.08.2022 йилда ишга кирган ва 25.01.2023 йилда меҳнатга лаёқатсизлик (хомиладорлик ва туғиш бўйича) варақасини расмийлаштирган бўлса, унинг узлусиз иш стажи 5 ой 20 кун бўлади. Бу ҳолда зарур бўлган узлуксиз иш стажи 6 ой бўлмаганлиги учун давлат томонидан ҳомиладорлик ва туғиш нафақаси қопланмайди. Демак, ҳомиладорлик ва туғиш бўйича нафақа иш берувчи томонидан тўлиқ тўланиши шарт.
Жавоблар улар эълон қилинган санада долзарб ҳисобланади.