Меҳнат кодексининг 116-моддасида ходимнинг розилиги билан унга иш кунининг (сменанинг) белгиланган давомийлиги мобайнида асосий иш билан бир қаторда худди ўша иш берувчида қўшимча ишни бажариш топширилиши мумкинлиги кўрсатилган. Ходимга топширилаётган қўшимча иш 3 хил ҳолатда бажарилиши мумкин. Булар:

1. бошқа касб (лавозим) бўйича қўшимча ишни бажараётган ҳолларда бир неча касбда (лавозимда) ишлаш. Бунда вакант бўлган бошқа лавозим бўйича қўшимча ишни бажариш тушунилади;

2. ходим асосий ишидаги айни ўша касб (лавозим) бўйича қўшимча ишни бажараётган ҳолларда хизмат кўрсатиш доираларини кенгайтириш ёки ишлар ҳажмини кўпайтириш. Бунда асосий иш бўйича лавозим қандай бўлса, қўшимча топширилаётган иш худди шу лавозим бўйича бажарилади.

3. вақтинча йўқ бўлган ходимнинг мажбуриятларини асосий ишидаги айни ўша касб (лавозим) ёки бошқа касб (лавозим) бўйича ишдан озод этилмаган ҳолда бажариш.

Демак, методист лавозимидаги ходим асосий иши билан бирга вакант бўлиб турган директор лавозими бўйича вазифани бажарса, бу 1-ҳолатга тушади. Агар вақтинча йўқ бўлган директор (таътил, касаллик, хизмат сафари ва ҳ.к.) вазифасини методист бажарса, бу 3-ҳолатга тушади.