Ха, раҳбар чет элдан корхонани бошқариши, яъни ўз вазифасини бажариши мумкин. Масофадан туриб ишлаш меҳнат шартномасида белгиланган меҳнат вазифасини иш берувчи жойлашган ердан, ҳудуддан ёки объектдан ташқарида бажаришдан иборат бўлиб, бунда меҳнат вазифасини бажариш ҳамда уни бажариш билан боғлиқ масалалар бўйича иш берувчи билан ходим ўртасида ҳамкорликни амалга ошириш учун ахборот- телекоммуникация тармоқларидан, шу жумладан Интернет жаҳон ахборот тармоғидан фойдаланиш шарт бўлади. Масофадан туриб ишловчи ходимларга нисбатан меҳнат тўғрисидаги қонунчилик ва меҳнат ҳақидаги бошқа ҳуқуқий ҳужжатларнинг амал қилиши татбиқ этилади (МК 452 м.). Меҳнат қонунчиликнинг ушбу шартлари корхона рахбарига хам таалуқли.
Масофадан туриб ишловчи ходим ва иш берувчи ўртасидаги ҳамкорлик корхонада қабул қилинган ички ҳужжатларда ёки меҳнат шартномасида кўрсатилган барча усуллардан фойдаланган ҳолда, электрон ҳужжатлар алмашинуви орқали амалга оширилади. Жўнатилган хабарда (хужжатда) жўнатган шахсни ишончли аниқлаш имкони бўлиш керак. Хужжатлар алмашинувида тарафларининг ҳар бири ўрнатилган муддатда бошқа тарафдан электрон ҳужжатни олганлиги ҳақидаги тасдиқномани юбориши шарт. Тарафлар ўзининг меҳнат фаолияти билан бевосита боғлиқ бўлган қабул қилинаётган ички ҳужжатлар, буйруқлар, билдиришномалар, талаблар ва бошқа ҳужжатлар билан ёзма шаклда, шу жумладан имзо қўйдириб таништирилиши керак бўлган ҳолларда электрон ҳужжат алмашинуви орқали таништирилиши мумкин. Масофадан туриб ишловчи ходим иш берувчига ариза билан мурожаат қилишга, иш берувчига тушунтиришлар, ўзи амалга ошираётган меҳнат фаолияти билан боғлиқ бошқа ахборотни электрон шаклда тақдим этишга ҳақли. (МК 460 м.).
Электрон рақамли имзо билан тасдиқланган электрон ҳужжат қоғоз ҳужжатга тенглаштирилади ва у билан бир хил юридик кучга эга бўлади ( “Электрон ҳужжат айланиши тўғрисида”ги қонуннинг 7 моддаси). Шунга кўра электрон хужжатлар алмашув сайтлари орқали юборилган хужжатлар хақиқий ҳисобланади. Лекин, юқорида айтиб ўтилганидек, корхонада қабул қилинган ички ҳужжатларда ёки меҳнат шартномасида кўрсатилган барча усуллардан фойдаланган ҳолда хужжатлар юборилиши мумкин.
Меҳнат шартномаси бўйича масофавий ишлаётган ходим иш хақи ва даромадларидан ўрнатилган тартибда солиқлар ушланиб қолинади.
Жавоблар улар эълон қилинган санада долзарб ҳисобланади.