Йўқ, мазкур ҳолатда ҳеч қандай ҳуқуқбузарлик йўқ.

СКнинг 72-моддаси нақд пулда ҳисоб-китоб қилиш билан товар (иш, хизмат)ларни реализация қилишда фискал хотирали назорат-касса машиналари (НКМ) мажбурий қўлланилишини талаб қилади. Бироқ фаолиятининг ўзига хос хусусияти сабабли НКМни қўлламасдан нақд пул билан ҳисоб-китоб қилишни амалга ошириши мумкин бўлган айрим тоифадаги юридик ва жисмоний шахслар мавжуд.  Уларнинг Рўйхати ВМнинг 17.11.2011 йилдаги 306-сон қарори билан тасдиқланган ҳамда унга 3-иловада келтирилган.

Мазкур Рўйхатга киритилган тоифалардан бири аҳолига пулли хизматлар кўрсатишда қатъий ҳисобот бериладиган бланкалар ҳисобланган талонлар, чипталар ва уларга тенглаштирилган бошқа ҳужжатларни берадиган юридик ва жисмоний шахслардир. Бу хўжалик юритувчи субъектларга нисбатан  “Аҳоли билан пулли ҳисоб-китобларни амалга оширишда фискал хотирага эга бўлган назорат-касса машиналарини қўллаш тартиби тўғрисида низомнинг 19-банди (ВМнинг 17.11.2011 йилдаги 306-қарорига 1-илова) билан улар аҳоли билан ўзаро ҳисоб-китобларни давлат солиқ хизмати органларида рўйхатдан ўтган чипталар, талонлар, чекларни ёки уларга тенглаштирилган бошқа ҳужжатларни мажбурий тартибда берган ҳолда амалга ошириши шартлиги белгиланган. Бироқ шаҳар ва шаҳар атрофи транспорт воситаларида йўловчиларни ташиш учун расмийлаштирилган йўлкира чипталари  бу қоидадан истисно қилинади – уларни солиқ органларида рўйхатдан ўтказиш лозим эмас.

 Шунингдек эслатиб ўтамизки, йўловчиларни ташишни амалга оширишда мавжуд бўлиши мажбурий бўлган ҳисобга олувчи асосий ҳужжатлардан бири автотранспорт воситаларининг чипталарни ҳисобга олиш варақаси  ҳисобланади, унинг бланкалари қатъий ҳисобда турадиган бланкаларни ҳисобга олиш ва сақлаш қоидалари бўйича ҳисобга олинади ва ташувчида сақланади (ВМнинг 4.11.2003 йилдаги 482-сон қарори билан тасдиқланган Автомобиль транспортида йўловчилар ва багажни ташиш қоидаларининг 20, 21-бандлари). Уни тўлдиришда Чипталарни ҳисобга олиш ва йўл варақаларини тўлдириш тўғрисидаги Йўриқномага (АВ томонидан 9.10.2003 йилда 1282-сон билан рўйхатдан ўтказилган) риоя қилиш мажбурий. У бўйича чипталарнинг сериялари ва рақамлари бўйича аниқ сарфи, сотилган чипталар учун тушум миқдори, бажарилган рейслар сони, шунингдек  ташилган йўловчилар ва бажариладиган йўловчи-километр сони бўйича умумий натижалар аниқланади (Йўриқноманинг 11-банди).

Шундай қилиб, модомики сиз шаҳар ва шаҳар атрофи транспорт воситаларида йўловчи ташиш бўйича хизматлар кўрсатаётган ва уларни йўлкира чипталари билан расмийлаштираётган экансиз, у ҳолда сиз бу чипталарни солиқ органларида рўйхатдан ўтказишингиз ҳам, ҳисоб-китобларда НКМни қўллашингиз ҳам шарт эмас. Йўлкира чипталарининг ўзи, шунингдек чипталарни ҳисобга олиш варақалари,   қатъий ҳисобда турадиган бланкалар бўлгани ҳолда НКМни қўлламаган ҳолда нақд пулни ўз вақтида ва тўлиқ кирим қилиниши ва банкка инкассация қилиниши устидан назоратни амалга ошириш имконини беради.