Моддий ёрдам – бу мақсадли хусусиятга эга бўлган ҳамда ходимлар билан юз берган шахсий тусдаги воқеалар, ҳодисалар ва тадбирлар билан боғлиқ бўлган ходимларга тўланадиган пул маблағлари. Улар компенсация ва мукофот тўловлари ҳисобланмайди, бу маблағларни олувчиларнинг бажарадиган иши ва уларнинг натижаларига боғлиқ эмас.

Моддий ёрдам  мажбурий тусга эга эмас ҳамда молиявий ҳолатга боғлиқ ҳолда корхона маблағлари ҳисобидан тўланади. Моддий ёрдам тўлаш тўғрисидаги қарор ходимнинг  аризаси асосида корхона раҳбари томонидан қабул қилинади ва буйруқ билан расмийлаштирилади.

Ўзбекистон Республикаси СКнинг 179-моддаси 1-бандига биноан қуйидаги ходимларга йил давомида тўланган моддий ёрдам суммаларига солиқ солинмайди:

1)      фавқулодда ҳолатлар муносабати билан бериладиган моддий ёрдам суммалари – тўлалигича;

2)      вафот этган ходимнинг оила аъзоларига ёки оила аъзоси вафот этганлиги муносабати билан ходимга бериладиган моддий ёрдам суммалари - энг кам иш ҳақининг ўн икки бараваригача миқдорда (мазкур норма ЎзРнинг 25.12.2013 йилдаги ЎРҚ-359-сон Қонунига асосан 1.04.2014 йилдан жорий қилинган);

3)      бошқа ҳолларда - солиқ даври учун энг кам иш ҳақининг ўн икки бараваригача миқдорда.

Бунда моддий ёрдамнинг солиқ солинмайдиган суммаси ҳисобот йилининг 1 январь ҳолатига белгиланган ЭКИҲ миқдоридан келиб чиқиб аниқланади ҳамда ЭКИҲ миқдори ўзгарган тақдирда қайта ҳисобланмайди.

Яъни, ходим ҳисобот даври мобайнида бошқа асосларга кўра 12 ЭКИҲ миқдорида (тўлов мақсадли хусусиятга эга бўлиши ҳамда ходимлар билан юз берган шахсий тусдаги воқеалар, ҳодисалар ва тадбирлар билан боғлиқ бўлиши лозим) ва унинг оила аъзоси вафот этганлиги (оила аъзоси – эр (хотин), ота-оналар ёки фарзандликка олувчилар ва болалар) муносабати билан 12 ЭКИҲ миқдорида солиқ солинмайдиган моддий ёрдам олиш ҳуқуқига эга.

Сизнинг ҳолатингизда моддий ёрдамнинг 1 420 800 сўмдан ҳар иккала суммасига ЖШДС солинмайди.