Моддий ёрдам остида мақсадли хусусиятга эга бўлган ҳамда ходимлар билан юз берган шахсий тусдаги воқеалар, ҳодисалар ва тадбирлар билан боғлиқ бўлган ходимларга тўланадиган пул маблағлари тушунилади. Шунингдек моддий ёрдам тушунчасига қишлоқ хўжалиги маҳсулотларини бериш ёки уларни сотиб олиш учун маблағлар бериш ҳам киритилади. Улар бу маблағларни олувчилар томонидан бажариладиган ишга ва унинг натижаларига боғлиқ эмас.
Моддий ёрдам иш ҳақидан фарқли ўлароқ мажбурий тусга эга бўлиши керак эмас.
ЎзР СКнинг 179-моддасига биноан қуйидаги моддий ёрдам суммаларига солиқ солинмайди:
-фавқулодда ҳолатлар муносабати билан– тўлалигича;
-вафот этган ходимнинг оила аъзоларига ёки оила аъзоси вафот этганлиги муносабати билан ходимга - энг кам иш ҳақининг ўн икки бараваригача миқдорда;
-бола туғилиши, ходим ёки унинг фарзандлари никоҳдан ўтиши муносабати билан бериладиган тўловлар, шунингдек қишлоқ хўжалиги маҳсулотларини бериш ёки уларни сотиб олиш учун маблағлар бериш тарзидаги тўловлар – солиқ даври учун энг кам иш ҳақининг ўн икки бараваригача миқдорда.
Таътилга моддий ёрдам (моҳиятан у таътилга қўшимча ҳақ ҳисобланади) ва ЎзР СКнинг 178-моддаси 16-бандида кўрсатилмаган моддий ёрдамнинг бошқа турлари рағбатлантириш хусусиятига эга тўловлар жумласига киради (ЎзР СКнинг 173-моддаси 4-банди). Бундай тўловлар меҳнатга ҳақ тўлаш тарзидаги даромадлар деб эътироф этилади (ЎзР СКнинг 172-моддаси). Мазкур тўловларга жисмоний шахслардан олинадиган даромад солиғи, ижтимоий суғуртага ажратмалар ва ЯИТ солинади (ЎзР СКнинг 306-моддаси).
Жавоблар улар эълон қилинган санада долзарб ҳисобланади.