1. Жисмоний шахс томонидан валюта қимматликларини сотиб олишда унинг мақсадларини кўрсатилишига қонунчилик томонидан талаб қўйилмаган.

Ўзбекистон Республикасининг 07.05.1993 й. 841-XII-сон "Валютани тартибга солиш тўғрисида"ги Қонунининг 13 – моддасига мувофиқ жисмоний шахслар ўз мулкида Ўзбекистон Республикасида олинган ёки сотиб олинган валюта бойликларига эга бўлишга, шунингдек валюта бойликларидан қонун ҳужжатларига мувофиқ мустақил равишда фойдаланишга ҳақлидирлар.

Юқорида кўрсатилган Қонуннинг мазмунидан келиб чиқиб айтиш мумкинки, корхонангиз ходими бўлмиш жисмоний шахснинг сафар харажатлари мақсадида хорижий валютани мустақил харид қилиши ва уни ушбу мақсадларда сарфлаши амалдаги қонунчиликка зид эмас.

2. “Вазирликлар, идоралар, корхоналар ва ташкилотлар ходимлари Ўзбекистон Республикаси ташқарисига хизмат сафарига юборилганда хизмат сафари харажатлари учун маблағлар бериш тартиби тўғрисидаги низом” (АВ томонидан 19.11.2015 й. 2730-сон билан рўйхатга олинган)нинг 43 – бандига мувофиқ, хизмат сафари харажатларига берилган маблағлардан фойдаланганлик тўғрисидаги бўнак ҳисоботи ташкилот бухгалтериясига хизмат сафаридан қайтиб келингандан кейин уч иш кунидан кечиктирмай бўнак олинган валютада тақдим этилади. Хизмат сафари натижалари бўйича якуний ҳисоб-китоб ҳужжатлар билан тасдиқланган ҳақиқий харажатлар бўйича, белгиланган меъёрлар ва қўшимча тўловларни ҳисобга олган ҳолда, бўнак ҳисоботини қабул қилиш кунидаги Ўзбекистон Республикаси Марказий банки курси бўйича амалга оширилади. Шундай қилиб, хизмат сафарига юборилган ходим амалда ишлатилган маблағлар бўйича сўмда ҳисобот тақдим этиши лозим. Хорижий валютада амалга оширилган харажатлар бўнак ҳисоботини қабул қилиш кунидаги ЎзР Марказий банки курси бўйича сўмга қайта ҳисобланиши керак. Айтиб ўтиш лозимки, юқорида кўрсатилган Низомнинг 1-Иловасида келтирилган тураржой учун харажатлар меъёри ҳар бир кун учун эмас, балки ҳар бир сутка учун белгиланган.