Ўзбекистон Республикаси Халқ таълими вазирлиги тўғрисида низомнинг¹ 8-бандига биноан мақсад ва вазифаларни бажариш учун халқ таълими вазирлиги ва унинг ҳудудий бўлинмалари мактабгача, умумий ўрта ва мактабдан ташқари таълим, педагог кадрларнинг малакасини ошириш ва уларни қайта тайёрлаш учун давлат талабларини белгилайди. Умумтаълим давлат муассасаларидаги лавозим учун номзодларга малака талаблари ички буйруқлар ва юқори давлат органларининг умумтаълим муассасалари фаолиятини тартибга солувчи низомлари асосида белгиланади.

Сизнинг саволингиз матнидан англашимча, Сизнинг умумтаълим мактабингизда директор ўринбосари лавозимига тайинлаш учун педагогика таълими соҳасида энг кам иш стажи 5 йилни ташкил қилади. Директор ўринбосари лавозимига тайинланган ходим 10 йил умумий стажга эга, бунда 5 йил педагогика таълими соҳасида. Меҳнат қонунчилигида бевосита тайинланишдан олдин зарур стажга эга бўлишни талаб қилувчи норма мавжуд эмас.

Агар ХТВнинг 191-буйруғида номзод бевосита тайинланишидан олдин олинган 5 йил узлуксиз стажга эга бўлиши кераклиги белгиланган бўлса, у ҳолда мазкур ҳолатда Сизнинг номзодингиз малака талабларига мувофиқ келмаган, чунки бошқа соҳада банд бўлганлиги сабабли унинг стажи узилган. Агар ундай белгиланмаган бўлса, номзоднинг стажи директор ўринбосари лавозими малака талабларига мувофиқ келган.