Ҳақиқатдан ҳам, Меҳнат кодексининг 148-моддаси 2-қисмида таътил учун ҳақ тўлаш жамоа шартномасида белгиланган муддатларда, лекин таътил бошланмасидан олдинги охирги иш кунидан кечикмай амалга ошилириши белгиланган.

Қонуннинг ушбу қатъий талаби ходимларнинг манфаатларини ҳимоя қилишга қаратилган бўлиб, уларнинг таътил вақтидан унумли фойдаланишини, таътил даврини пулни олиш учун сарфламаслигини ва ортиқча сарсон бўлмаслигини кафолатлайди.

Агар кўриб чиқилаётган ҳолатда ҳақиқатдан ҳам, саволда номи тилга олинган электрон дастурнинг айрим техник параметрлари юқоридаги қонун талабига тўғри келмаса, бу ҳолат бартараф этилиши шарт.

Шунингдек, ушбу важ асосида таътил учун ҳақ тўлашни кечиктирилиши ноқонуний бўлиб, бундай қонунбузилишига йўл қўйган айбдор мансабдор шахсларнинг Маъмурий жавобгарлик тўғрисидаги кодекснинг 49-моддасига мувофиқ жавобгарликка тортилишига асос бўлади. Ушбу моддага мувофиқ меҳнат ва меҳнатни муҳофаза қилиш тўғрисидаги қонун ҳужжатларининг бузилиши, - энг кам иш ҳақининг икки бараваридан беш бараваригача миқдорда жарима солишга сабаб бўлади.

Савол муаллифи ўз ҳуқуқларини бузилган деб ҳисобласа, бу борада Меҳнат вазирлигининг ҳудудий бўлимига, прокуратура идораларига ёки бошқа ҳуқуқни муҳофаза қилучи ташкилотларга мурожаат қилиш ҳуқуқига эга.