ЎзР Солиқ кодексининг 177 – моддасига мувофиқ юридик шахс томонидан жисмоний шахсга текинга берилган мулк қиймати жисмоний шахснинг моддий наф тарзидаги даромади ҳисобланади.
Хорижий юридик шахс – ҳадя этувчи ушбу ҳолатда солиқ агенти бўла олмайди, чунки Солиқ кодексининг 184 – моддасига мувофиқ жисмоний шахсларнинг даромадларига солинадиган солиқни тўлов манбаида ҳисоблаб чиқариш, ушлаб қолиш ва тўлаш мажбурияти фаолиятни Ўзбекистон Республикасида доимий муассаса орқали амалга ошираётган Ўзбекистон Республикаси норезидентлари ҳамда чет эл юридик шахсларининг ваколатхоналари зиммасига юклатилади. Бунда Солиқ кодексининг 20 – моддасига мувофиқ, Ўзбекистон Республикаси норезидентининг ЎзР резиденти бўлган юридик шахснинг устав жамғармасидаги (устав капиталидаги) улушга эга бўлиши доимий муассасанинг ҳосил бўлишига олиб келмайди.
Солиқ кодексининг 189 – моддасига мувофиқ солиқ агенти бўлмаган манбалардан олинган даромадлар декларация асосида солиққа тортилади. Юридик шахсдан текинга олинган мулк шаклидаги даромадларга шкала бўйича солиқ ҳисобланади.
Текинга мулкни олган жисмоний шахс доимий яшаш жойидаги давлат солиқ хизмати органига ҳисобот йилидан кейинги йилнинг 1 апрелидан кечиктирмай тақдим этиши керак.
Юридик шахслар учун: Совға қилувчи – норезидент ва уставдаги улуши текинга берилаётган МЧЖ учун ҳеч қандай солиқ оқибати юзага келмайди. Чунки улар даромад олишмаяпти ва ушбу битимда солиқ агенти сифатида иштирок этишмаяпти.
Жавоблар улар эълон қилинган санада долзарб ҳисобланади.