Сизнинг саволингиздан келиб чиқадики, сиз ташкилотда асосий иш жойи бўйича ишлагансиз, кейин ишлашни давом эттирган ҳолда магистратурага ўқишга киргансиз, шундан сўнг ташкилотингизда сизни қисқартирилган иш ҳафтасига ўтказишган.

Меҳнат дафтарчаларини юритиш тартиби тўғрисида йўриқноманинг 2.1-бандига (АВ томонидан 29.01.1998 йилда 402-сон билан рўйхатдан ўтказилган, кейинги ўринларда - Йўриқнома) мувофиқ  меҳнат дафтарчасига иш тўғрисида қуйидаги маълумотлар киритилади: ишга қабул қилиш, бошқа доимий ишга ўтказиш (жамоа шартномасида кўрсатилган асосларда ишлаб чиқариш зарурияти билан вақтинча бошқа ишга ўтказиш бундан мустасно), меҳнат шартномасини бекор қилиш. Тегишинча, ходимнинг иш куни режимидаги ўзгаришлар меҳнат дафтарчасига киритилмайди.

Йўриқноманинг 2.14-бандига биноан меҳнат дафтарчаси бор бўлган талабаларга, ўқувчиларга, катта илмий ходим-изланувчиларга ва тиббиёт ординаторларига ўқув юртлари (илмий муассасалар) томонидан олий ва ўрта махсус ўқув юртларининг кундузги бўлимларида ўқиган вақтлари тўғрисида ёзув киритилади. Бундай ёзувларга асос бўлиб талабалар, ўқувчилар, катта илмий ходим-изланувчилар ва клиник ординаторлар сафига қабул қилинганлиги ёки сафидан чиқариш тўғрисидаги ўқув юртлари (илмий муассасалар)нинг чиқарган буйруқлари ҳисобланади. Гарчи Сизнинг иш берувчи билан меҳнатга оид  муносабатларингиз ўқишга кирганингиз муносабати билан бекор бўлмаятган экан, сиз таълим муассасаси маълумотномаси ва ўқишга қабул қилиш тўғрисидаги буйруқ нусхаси асосида иш берувчига Сизнинг меҳнат дафтарчангизга тегишли қайдлар киритилиши юзасидан ариза билан мурожаат қилиш ҳуқуқига эгасиз.

Шунингдек қайд қилишни хоҳлардикки, “Фуқароларнинг давлат пенсия таъминоти тўғрисида” 03.09.1993 йилдаги 98-XII-сон Қонуннинг 37-моддаси биринчи қисми “е” кичик бандига асосан олий таълим муассасаларида, аспирантурада, стажёр-тадқиқотчи-изланувчилар институтида, докторантурада, катта илмий ходим-изланувчилар институтида ва клиник ординатурада кундузги ўқиш, шу жумладан чет элда ўқиш иш стажига қўшиб ҳисобланади.