Ҳа, агар меҳнат шартномаси ёки корхонанинг меҳнат муносабатларини тартибга солувчи ички ҳужжатлар билан назарда тутилган бўлса, директор ойига 2 кун ишлашга ҳақли.
Ходим иш тартиби ёки графигига ёхуд меҳнат шартномаси шартларига мувофиқ ўз меҳнат вазифаларини бажариши лозим бўлган вақт иш вақти ҳисобланади (МК 114-моддаси).
Иш вақти давомийлиги ходимларга ички меҳнат тартибининг қоидаларида белгиланган иш вақтига нисбатан кам бўлса, у тўлиқсиз иш вақти ҳисобланади. Ходим билан иш берувчи ўртасидаги келишувга биноан ишга қабул қилиш чоғида ҳам, кейинчалик ҳам, яъни меҳнат шартномаси муддати давомида ҳам тўлиқсиз иш куни ёки тўлиқсиз иш ҳафтаси белгилаб қўйилиши мумкин. Қонунчилик томонидан тўлиқсиз иш вақти белгиланиши мумкин бўлган шахслар рўйхати чекланмаган. Тўлиқсиз иш вақти меҳнат шартномасига асосан ҳар қандай ходимга нисбатан белгиланиши мумкин (МК 119-моддаси).
Агар махсус иш жадвали меҳнат шартномаси ёки корхонанинг меҳнат муносабатларини тартибга солувчи ички ҳужжатлари билан асосланмаган бўлса, директорнинг ишда бўлмаган вақтини иш ҳақи сақланмаган ҳолда таътил берилганлиги билан асослаш мумкин.
Агар, махсус иш тартиби назарда тутилмаган бўлса, шунингдек, директорнинг ўз иш жойида бўлмаганлигини асословчи ҳужжатлар бўлмаса, директорнинг тўлиқ ой ишлаганлигидан келиб чиқиб солиқ органлари ЯИТни тўлиқ ой учун ҳисоблашга ҳақлидирлар.
Жавоблар улар эълон қилинган санада долзарб ҳисобланади.