1. Вақтинча молиявий ёрдамни олган томон солиқни (солиқ тизимидан келиб чиққан ҳолда) МБ қайта молиялаштириш ставкасидан келиб чиқиб аниқланадиган даромаддан тўлайди (СК 132, 135, 355-моддалари). Агар шартномада пул маблағларидан фойдаланганлик учун фоизлар тўлови назарда тутилмаган бўлса, унда даромад қайта молиялаштириш ставкасидан келиб чиқиб аниқланади. Бугунги кунда қайта молиялаштириш ставкаси 9%ни ташкил этади.

Даромадни аниқлашнинг ушбу тартиби фоизли қайтарилувчи моддий ёрдамга нисбатан ҳам тадбиқ этилади, агарда шартномада белгиланган фоиз ставкаси МБнинг моддий ёрдамни олиш кунига белгиланган қайта молиялаштириш ставкасидан кам миқдорда белгиланган бўлса (СК 135-моддаси).

2. Вақтинчалик молиявий ёрдамдан фойдаланганда олинган даромад суммаси умумбелгиланган солиқ тўловчиларида даромад солиғини ҳисоблашда жами даромадга киритилади, ЯСТ тўловчиларида эса ялпи тушумга киритилади. Солиқни вақтинчалик молиявий ёрдамни олган томон тўлайди.

Масалан, сизнинг корхонангиз ЯСТ тўловчиси, 1000 минг сўм миқдорида 1 йил муддатга молиявий ёрдам олди. Асосий фаолият бўйича ЯСТ ставкаси 5% га тенг. Шартномада пул маблағларидан фойдаланганлик учун фоизлар тўлови белгиланмаган. Пул маблағларидан фойдаланганликдан олинган даромадни аниқлаймиз: 90 минг сўм (1 000 000 х 9%). Даромад суммаси (90 минг сўм) корхонанинг бошқа даромадларига киритилиб, ЯСТнинг асосий фаолият учун белгиланган ставкаси бўйича солиққа тортилади.

ЯСТ суммаси 4,5 минг сўмни (90 минг сўм х 5%) ташкил этади.