1. Йил мобайнида ходимнинг асосий иш жойи ўзгарган тақдирда ушбу ходимга жорий йилда тўланган даромадлар ва ушлаб қолинган жисмоний шахслардан олинадиган даромад солиғи (ЖШДС) суммалари тўғрисидаги маълумотнома берилади. Ушбу маълумотномани ходим янги асосий иш жойидаги бухгалтерияга дастлабки иш ҳақи ҳисоблангунига қадар тақдим этиши шарт.

Агар ходим илгариги иш жойидан бундай маълумотномани тақдим этмаса, унда унинг янги асосий иш жойида ҳисобланган даромадларидан ЖШДС энг юқори ставкада ушлаб қолинади.

Меҳнат шартномаси бекор қилингандан сўнг ходимга илгариги асосий иш жойида тўловлар ҳисобланса, ушбу тўловлар ходимнинг асосий бўлмаган иш жойидан олинган даромадлар бўлиб ҳисобланади.

Асосий бўлмаган иш жойида олинган даромадлардан ЖШДС икки ҳил тартибда ҳисобланиши мумкин: белгиланган шкала бўйича ёки ходимнинг ёзма аризасига асосан энг юқори ставкада. Агар ЖШДС белгиланган шкала бўйича ҳисобланса, унда ушбу даромадлар тўғрисида юридик шахс рўйхатга қўйилган давлат солиқ хизмати органига 30 кун ичида белгиланган шаклда маълумот бериши шарт. Агарда ушбу даромадлардан ЖШДС энг юқори ставкада ушлаб қолинган бўлса, бундай маълумот солиқ органига тақдим этилмайди.

Маълумотнома сизнинг ташкилотингиз қайси солиқ органида рўйхатга қўйилган бўлса, ўша солиқ органига тақдим қилинади. СКнинг 186-моддаси 7-қисмида айнан шу назарда тутилган. Яъни ишдан кетган ходимнинг қайси ташкилотга кетгани ва мазкур ташкилот қайси солиқ органида ҳисобга қўйилгани ҳақидаги малумотлар сиз учун ахамияти йўқ.

Маълумотноманинг шакли Жисмоний шахслардан олинадиган даромад солиғи бўйича тасдиқланган солиқ ҳисоботи шаклларида келтирилган (АВ 22.03.2013й. 2439-сон билан рўйхатга олинган, МВ ва ДСҚнинг 04.03.2013й. 23, 2013-8-сон қарорига 2-илова).

Албатта, ушбу маълумотномани my.soliq.uz сайти орқали юбориш мумкин.

Ушбу маълумотни 30 кун ичида давлат солиқ хизмати органларига тақдим этиши шартлиги СКнинг 187-моддаси 1-бандида белгилаб қўйилган. Солиқ хизмати органига ушбу маълумот жисмоний шахсларнинг жами йиллик даромади тўғрисидаги декларацияни қабул қилиш жараёнида зарур бўлади.

2. СКнинг 186-моддаси 7-қисмида назарда тутилган маълумотномада жисмоний шахснинг асосий бўлмаган иш жойидан олинган маълумотлар кўрсатилади. Сизнинг ҳолатда маълумотномада фақат ходимга ишдан кетгандан сўнг ҳисобланган даромад суммаси кўрсатилиши керак.