Айнан металл шуруп ва саморезларни ишлаб чиқарувчи корхоналар учун алоҳида қонун хужжатлари билан солиқ ва божхона тўловлари бўйича имтиёзлар белгиланмаган.
Лекин, корхонангиз ушбу металл буюмларни ишлаб чиқаришда сотиб олинган янги технологик асбоб-ускуналарни ишлатаётган бўлса, унда Адлия вазирлигида 11.06.2007й. 1688-сон билан рўйхатга олинган Низомга мувофиқ ушбу технологик асбоб-ускуналарни олишга йўналтирилган маблағлар суммасига ягона солиқ тўлови бўйича солиқ солинадиган базани қамайтирган ҳолда солиқ ҳисоблашингиз мумкин. Бунда солиқ солинадиган база кўпи билан 25 фоизига камайтирилади ва технологик асбоб-ускуналар фойдаланишга жорий этилган солиқ давридан бошлаб беш йил мобайнида амалга оширилади.
Юқоридаги Низом асосида божхона тўловлари бўйича имтиёз технологик жиҳоз ва унга тегишли бутловчи ва эҳтиёт қисмларнинг қўшилган қиймат солиғи ва импорт божхона божларидан озод қилиш кўринишида берилган.
Агар корхонангиз қурилиш материаллари ишлаб чиқарувчи ташкилот сифатида «Қишлоқ қурилиш инвест» ИК МЧЖга ёки ушбу МЧЖ билан шартномалар тузган пудрат ташкилотларига қурилиш материалларини реализация қилса, унда 2017-2021 йилларда ушбу реализация қилинган ҳажмлардан солиқлар тўламайди (Президентнинг 21.10.2016й. ПҚ-2639-сонли қарори 12-банди).
Агарда корхонангиз кичик тадбиркорлик субъекти сифатида янги ташкил этилган бўлиб, Қорақалпоғистон Республикаси ёки Хоразм вилоятида жойлашган бўлса, унда Президентнинг 18.01.2017й. ПҚ-2731-сонли қарорига асосан 2022 йил 1 январига қадар муддатга ягона солиқ тўловини тўлашдан озод қилинади. Бунда Қорақалпоғистон Республикасининг Мўйноқ, Шуманай, Қонликўл, Тахтакўпир, Чимбой туманларида, Хоразм вилоятининг Янгиариқ ва Қўшкўпир туманларида жойлашган корхоналар учун имтиёз муддати 2027 йилнинг 1 январига қадар белгиланган.
Жавоблар улар эълон қилинган санада долзарб ҳисобланади.