Жисмоний шахс фойдасига тўланган хизматлар қиймати корхона мулкдори ихтиёрида қоладиган фойда суммасидан тўланса, солиқ оқибатлари юзага келмайди, харажатлар ҳисобига тўланганда ЖШДС бўйича мажбурият юзага келади.
Агар тўлов корхона харажатлари ҳисобига амалга оширилиши назарда тутилган бўлса, у ишларни қабул қилувчи жисмоний шахснинг (корхона раҳбари отасининг) моддий наф тарзидаги даромади сифатида қаралади (СКнинг 177-моддаси 1-банди). Даромадларни тўловчи корхона тўлов манбаи сифатида тўловни амалга ошириш пайтида ундан умумбелгиланган тартибда ЖШДС ни ушлаб қолиши зарур (СКнинг 186-моддаси).
Меҳнатга оид муносабатларда бўлмаган жисмоний шахсга моддий наф тарзида даромад тўловчи солиқ агенти бўлган корхона жисмоний шахснинг ёзма аризаси асосида ЖШДСни ушлаб қолмасликка ҳақлидир (СКнинг 184-моддаси). Бунда корхона солиқ даври (йил) тугагач 30 кун ичида даромад олган шахс ҳақида тегишли маълумотларни солиқ органларига тақдим этиши, жисмоний шахс эса ушбу даромаддан мустақил равишда декларация асосида ЖШДСни тўлаши шарт (бўйича СКнинг 187 ва 189-моддалари).
Аммо, корхона раҳбари ушбу ҳомийлик тўловини корхонанинг харажати ҳисобидан эмас, балки солиқлар ва бошқа мажбурий тўловларни тўлаганидан кейин хусусий корхона мулкдори ихтиёрида қоладиган фойда суммаси ҳисобидан тўланишини белгиласа, корхонада ҳам, корхона раҳбарининг отаси бўлмиш жисмоний шахсда ҳам ҳеч қандай солиқ оқибатлари юзага келмайди. Чунки корхона раҳбарининг ушбу даромади ЖШДСдан озод этилган (СКнинг 179-моддаси 6-банди).
Жавоблар улар эълон қилинган санада долзарб ҳисобланади.