Депозит қўйилмаси тўғрисидаги шартномасини қарз шартномаси деб эътироф этилмайди. Қонунчилик ушбу икки турдаги шартномага аниқ таърифлар келтирган.
Қарз шартномаси бўйича бир тараф (қарз берувчи) иккинчи тарафга (қарз олувчига) пул ёки турга хос аломатлари билан белгиланган бошқа ашёларни мулк қилиб беради, қарз олувчи эса қарз берувчига бир йўла ёки бўлиб-бўлиб, ўшанча суммадаги пулни ёки қарзга олинган ашёларнинг хили, сифати ва миқдорига баравар ашёларни (қарз суммасини) қайтариб бериш мажбуриятини олади (ФКнинг 732-моддаси).
Банк омонати шартномаси бўйича биринчи тарафдан (омонатчидан) қабул қилиб олган ёки унинг номига келган пул суммасини (омонатни) қабул қилиб олган иккинчи тараф (банк) шартномада назарда тутилган шартлар асосида ва тартибда омонат суммасини қайтариш ва унга фоизлар тўлаш мажбуриятини олади (ФКнинг 759-моддаси).
Корхонангизда банкка депозит шартномаси асосида қўйилган қўйилмалар, улардан олинадиган даромадлар юзасидан солиқ оқибатлари юзага келмайди.
СКнинг 135-моддасида белгиланган солиққа тортилувчи даромад қарз олувчи корхонада, башарти қарз учун фоиз тўлови назарда тутилмаган, ёки фоиз ставкаси МБнинг қайта молиялаштириш ставкасидан паст этиб белгиланган бўлса, юзага келади. Ушбу масала юзасидан батафсил ушбу жавобларда ўқишингиз мумкин:
http://kadrovik.uz/question/7948
http://kadrovik.uz/question/8107
http://kadrovik.uz/question/8592
http://kadrovik.uz/question/8712
Кредит ташкилотлари, банклар томонидан ўз профессионал фаолиятидан олинадиган даромадлари солиқ солиш СКнинг 22-бобига мувофиқ амалга оширилади, СКнинг 135-моддасида кўрсатилган норма банк ва кредит ташкилотларига тадбиқ этилмайди. Шу сабабли, банкда ҳам, сизнинг корхонангизда ҳам СКнинг 135-моддасида кўрсатилган даромад юзага келмайди, мос равишда солиқ оқибатлари ҳам пайдо бўлмайди.
Жавоблар улар эълон қилинган санада долзарб ҳисобланади.