СКнинг 179-моддаси 30-бандига асосан жисмоний шахсларнинг қуйидаги мақсадларга йўналтирилган иш ҳақи ва бошқа даромадларига ЖШДС солинмайди:

• ёш оила аъзоларининг шахсий уй-жой ёки кўп қаватли уйда хонадон қуриш, таъмирлаш ва сотиб олиш учун олинган ипотека кредитлари ва улар бўйича ҳисобланган фоизларни қоплаш учун йўналтирилган даромадлари;
• қонун ҳужжатларида белгиланган манбалар ҳисобидан қишлоқ жойларда намунавий лойиҳалар бўйича якка тартибда иморат қурувчилар, шунингдек уларнинг оила аъзоларининг ушбу кредитлар ва улар бўйича ҳисобланган фоизларни қоплаш учун йўналтирилган даромадлари.

Ёш оилалар тоифасига – турмуш қурганларнинг ёши 30 ёшдан ошмаган, ёки болаларни (болани) 30 ёшдан ошмаган ота-онадан бири, шу жумладан, турмушидан ажрашган эркак (аёл), бева (бева аёл) кишилар тарбиялаётган оилалар киритилади (ЎзР Президентининг 18.05.2007 йилдаги № ПФ-3878 Фармони, 3-банди).

Қишлоқ жойларда намунавий лойиҳалар бўйича якка тартибда уй-жой қуришни амалга ошираётган жисмоний шахслар учун ёш бўйича чеклов қўйилмаган (ЎзР Президентининг 03.08.2009 йилдаги № ПҚ-1167 қарори).

Сизнинг ёшингиз ўттиздан ошгани учун ёш оила аъзоси таснифига тўғри келмайсиз. Лекин, бизнинг фикримизча иш ҳақингизни қишлоқ жойларда намунавий уй-жой қуриш учун белгиланган тартибда олинган кредитларни қоплашга йўналтирсангиз, ЖШДС бўйича юқорида кўрсатилган имтиёздан фойдаланишингиз мумкин.