Корхонада кредиторлик қарзи мавжудлиги факти, мажбуриятни сўндириш вақти муддатидан ўтиб кетган тақдирда ҳам, ҳисобдан чиқарилмагунига қадар ҳеч қандай солиқ оқибатларига олиб келмайди. Корхона кредиторлик қарзини ҳисобдан чиқарса, унда мажбуриятни ҳисобдан чиқаришдан олинган “бошқа даромад” юзага келади (СКнинг 132-моддаси, 136-моддаси). Мажбуриятни даъво муддати ўтганидан кейин ҳисобдан чиқариш мумкин. ФКнинг 150-моддасига асосан, умумий даъво муддати уч йилни ташкил этади. Шунингдек, ФКнинг 25-бобида белгиланган ҳолатларда мажбуриятни ҳисобдан чиқариш мумкин.
Мажбурият ҳисобдан чиқарилганда унинг суммаси бошқа даромад сифатида тан олинади ва молиявий натижаларга чиқарилади. Шунда солиқ солинадиган фойда суммасига таъсир кўрсатади (яъни уни оширади).
Агар кредитор-корхона (айни ҳолатда хорижий етказиб берувчи) бирор-бир сабабга кўра ўз фаолиятини тўхтатса ёки ликвидация қилинса, у ҳолда вазиятга қараб иш тутилгани маъқул. Бу борада кўпроқ маълумотга эга бўлиш учун Фуқаролик Кодексининг тегишли бўлимлари билан, хусусан 25-боби билан мукаммал танишиб чиқишни тавсия этамиз. Шунингдек, бундай ҳолат юзага келган тақдирда, малакали юрист ёки солиқ маслаҳатчиси иштирокида харакат қилингани маъқул деб ҳисоблаймиз.
Жавоблар улар эълон қилинган санада долзарб ҳисобланади.