Ўриндош аёл ҳомиладорлик ва туғиш нафақасини олишга ҳақли
1.Ҳа, аёлларга ўриндошлик асосидаги иш жойидан ҳомиладорлик ва туғиш нафақаси тўланади.
Ўриндошлик асосида ишлаётган аёлларга асосий иш жойидаги таътил билан бир вақтда ҳомиладорлик ва туғиш нафақаси берилади (МК 143-моддаси).
Ўриндошлар ўриндошлик асосидаги иш жойи бўйича вақтинча меҳнатга лаёқатсизлик нафақаси олиш, аёллар эса, бундан ташқари, ҳомиладорлик ва туғиш нафақалари олиш ҳуқуқига эгадир (ВМнинг 2012 йил 18 октябрдаги 297-сон қарорига иловадаги Низомнинг 18-банди).
Ҳомиладорлик ва туғиш нафақаларини қонун ҳужжатларида белгиланган миқдорларда тўлаш бўйича мажбуриятдан бўйин товлаш БҲМнинг 10 бараваридан 15 бараваригача миқдорда жарима солишга сабаб бўлади. Худди шундай ҳуқуқбузарлик маъмурий жазо чораси қўлланилганидан кейин бир йил давомида такроран содир этилган бўлса, БҲМнинг 15 бараваридан 30 бараваригача миқдорда жарима солишга сабаб бўлади (Маъмурий жавобгарлик тўғрисидаги кодекснинг 49-3-моддаси).
2.Ушбу нафақани олиш учун ҳомиладор аёл ўриндошлик асосидаги иш жойига соғлиқни сақлаш муассасаси томонидан берилган меҳнатга лаёқатсизлик варақасининг белгиланган тартибда тасдиқланган нусхасини тақдим этиши лозим (Низомнинг 19-банди).
Жавоблар улар эълон қилинган санада долзарб ҳисобланади.